Vətəninfo.az xəbər verir ki, Rusiya Silahlı Qüvvələri Donetsk vilayətində növbəti uğurlar əldə edib. Ukraynanın müharibə zonasındakı vəziyyətini izləyən DeepState analitik qrupunun məlumatına görə, Pokrovski rayonunun Zatışok kəndi Rusiya ordusu tərəfindən işğal edilib.
Məlumata görə, bundan əlavə, Rusiya qüvvələri Donetsk vilayətinin digər istiqamətlərində də irəliləyişə nail olub. Belə ki, Konstantinovski istiqamətində və Çasovıy Yar yaxınlığında rus qoşunlarının fəallaşması nəticəsində Belitskoye, Novomarkovoye, Diliyevka və Aleksandro-Kalinovo kəndləri yaxınlığında mövqelər dəyişib.
Bundan əvvəl Volnovaxa rayonunun Novoxatskoye və Tolstoye kəndlərinin də rus qüvvələrinin nəzarətinə keçdiyi bildirilmişdi.
DeepState analitikləri həmçinin Dnepropetrovsk vilayəti ilə sərhəddə yerləşən Daçnoye bölgəsində də Rusiya ordusunun irəliləməsini qeydə alıblar. Qeyd olunur ki, Daçnoye qəsəbəsinin böyük hissəsi hazırda “boz zona” adlandırılan, nəzarətin tam müəyyən olunmadığı ərazidə yerləşir və burada aktiv döyüş əməliyyatları davam edir. Rus qüvvələrinin kəndi tam nəzarətə götürmək üçün cəhdləri davam edir.
Lakin Ukrayna Silahlı Qüvvələrinin Baş Qərargahı bu məlumatlara münasibət bildirərək Daçnoyenin işğal olunması ilə bağlı informasiyanın həqiqəti əks etdirmədiyini açıqlayıb.
Hazırda cəbhə xəttində vəziyyət gərgin olaraq qalır və qarşıdakı günlərdə hərbi əməliyyatların intensivləşəcəyi gözlənilir.
