Musavat.com xəbər verir ki, ABŞ administrasiyası Venesuela ətrafında hərbi gərginliyi yeni mərhələyə keçirir. CBS News yazır ki, yüksək rütbəli hərbi rəhbərlik prezident Donald Trampa yaxın günlər üçün hazırlanan mümkün hərbi əməliyyat planlarını təqdim edib.
Məlumata görə, müdafiə naziri Pit Hegset, Birləşmiş Qərargah Rəisləri Komitəsinin sədri Dən Keyn və digər komandirlər Ağ Evdə keçirilən qapalı iclasda yenilənmiş əməliyyat ssenarilərini prezidentə təqdim ediblər. Planlar arasında Venesueladakı yerüstü hədəflərə qarşı hava zərbələri də yer alır.
Mənbələr bildirir ki, Donald Tramp hələlik son qərarı verməyib. Ağ Ev rəsmiləri şərh verməkdən yayınıb, Pentaqon isə ümumiyyətlə mövzuya münasibət bildirməyib.
Kəşfiyyat əməliyyatı dəstəkləyir
ABŞ kəşfiyyat qurumları əməliyyat üçün məlumat toplama prosesində aktiv iştirak edir. CBS News qeyd edir ki, Milli Kəşfiyyat direktoru Tulsi Qabbard iclasda iştirak etməyib — səbəb xarici səfərdən geri qayıtması ilə bağlıdır.
Dövlət katibi Marko Rubio isə həmin gün Kanadada keçirilən G7 xarici işlər nazirlərinin görüşündə idi.
“Gerald Ford” bölgəyə daxil oldu
Həftənin əvvəlində ABŞ Hərbi Dəniz Qüvvələrinin ən böyük aviadaşıyıcılarından biri — USS Gerald Ford Cənub Komandanlığının məsuliyyət zonasına daxil olub. Bu komandanlıq Karib hövzəsi və Cənubi Amerikadakı hərbi əməliyyatlara nəzarət edir.
Aviadaşıyıcıya bölgədə fəaliyyət göstərən esmineslər, hərbi təyyarələr və xüsusi təyinatlı qüvvələr qoşulub. ABŞ ordusu son iki ayda narkotik daşıdığı iddia edilən 21 gəmini məhv edib, nəticədə ən azı 80 nəfər kontrabandçı öldürülüb, yalnız iki nəfər sağ qalıb.
Hegsetdən sərt xəbərdarlıq
İndiana ştatının Fort-Ueyn şəhərində çıxış edən müdafiə naziri Hegset ABŞ administrasiyasının narkotrafikə qarşı siyasətini belə ifadə edib:
“Tövsiyəm odur ki, terror təşkilatının üzvüsünüzsə, heç vaxt qayığa minməyin. Əgər amerikalıları narkotiklə zəhərləyirsinizsə — sizi tapacağıq və öldürəcəyik.”
“Çox qısa müddətdə əməliyyata keçid” mümkün sayılır
ABŞ mediası yazır ki, administrasiya hazırda Venesuela istiqamətində növbəti addımı müəyyənləşdirir və prosesin “çox qısa müddətdə” real hərbi əməliyyat mərhələsinə keçə biləcəyi istisna edilmir.
Musavat.com
