Nigeriya təhlükəsizlik qüvvələri ölkənin qərbində yerləşən Kvara əyalətinin Eruku bölgəsindəki bir kilsədən qaçırılan 38 nəfərin hamısını azad edib.
Ölkə Prezidenti Bola Əhməd Tinubu bu barədə sosial media səhifəsində məlumat verib.
Dövlət başçısı təhlükəsizlik qüvvələrinin işini şəxsən əlaqələndirmək üçün Cənubi Afrika Respublikasında keçirilən G20 sammitində iştirakını ləğv etdiyini xatırladıb.
Tinubu həmçinin Niger əyalətindəki məktəbdən qaçırılan 51 şagirdin tapılmasından məmnunluğunu ifadə edib.
Nigeriya lideri olkədəki təhlükəsizlik vəziyyətini yaxından izlədiyini vurğulayıb. Prezident vəzifəsi dövründə insanların təhlükəsizliyinin təmin ediləcəyinə əminlik verib.
Məlum olduğu kimi, noyabrın 18-də Kvara əyalətinin Eruku bölgəsindəki Məsih Apostol Kilsəsinə hücum edilib və nəticədə 38 adam qaçırılıb.
Noyabrın 21-də isə terror təşkilatının üzvləri Niger əyalətindəki Müqəddəs Məryəm Məktəbinə basqın edərək şagirdləri və işçiləri oğurlayıblar. Oğurlanan 300 adamdan 51-i qaçmağı bacarıb.
Rizvan CƏFƏROV,
“Azərbaycan”
