Rusiya Pravoslav Kilsəsində mərasim və digər kilsə xidmətləri üçün tələb olunan ianələrin məbləği son illərin ən yüksək səviyyəsinə çatıb.
Msuavat.com xəbər verir ki, Ukraynaya qarşı genişmiqyaslı müharibənin başlanğıcından bəri ritualların və ayinlərin qiyməti orta hesabla 40 faizə yaxın artıb.
Bahalaşma xüsusilə vəftiz, kilsə nikahı və dəfn mərasimlərində daha kəskin hiss olunur.
Araşdırma 70 regiondan seçilmiş 140 kilsə və monastırın rəsmi resursları üzrə aparılıb. Jurnalistlərin hesablamalarına görə, qiymət dəyişikliyi 91 dini müəssisədə qeydə alınıb. Ayrı-ayrı məkanlarda isə artım ümumi tendensiyanı xeyli üstələyir. Məsələn, Kaluqadakı Qadın Monastırında ayinlərin dəyəri 345 faiz, Svato-Pokrov qadın monastırında isə 192 faiz yüksəlib.
Ümumi tendensiya aşağıdakı rəqəmlərlə xarakterizə olunur: vəftiz mərasiminin keçirilməsi orta hesabla 1,5 dəfə, kilsə nikahının kəsilməsi 107 faiz, dəfn və vida mərasimləri isə 71 faiz bahalaşıb. Digər xırda və qısa ayinlər - panixida, moleben, sağlamlıq üçün qeyd yazdırılması və s. - üzrə artım təxminən 56 faiz olaraq göstərilir.
Mövzuya münasibət bildirən protorey Andrey Kordoçkin qiymətlərin artırılmasının əsasən yeparxiya səviyyəsində qəbul olunan göstərişlərlə əlaqəli olduğunu deyib. Onun sözlərinə görə, burada həm də ümumi iqtisadi fon - inflyasiya, enerji və kommunal xərclərin yüksəlməsi rol oynayır.
Beləliklə, Rusiyada kilsə həyatının ənənəvi elementləri olan dini rituallar artıq çoxları üçün əvvəlki qədər əlçatan deyil. Artımın sosial və mənəvi nəticələri barədə isə müxtəlif dairələrdə müzakirələr davam edir.
Musavat.com
