Stomatoloji prosedurlar günümüzdə artıq çox maddiyyat tələb edən xidmətlər sırasındadır. Əvvəllər dişin müalicəsi, plomb qoyulması bir qiymət çərçivəsində edilirdisə, artıq hər diş kanalının müalicəsi üçün ayrıca qiymət cədvəli mövcuddur. Poliklinikalarda da stomatoloji xidmətlər heç də ürəkaçan vəziyyətdə deyil. Paradontit prosedurunun 10 seansı 59-70 azn, işıqla bərkidilən plomb 21-25 azn, ön dişlərin bərpası 39-47 azn, estetik breketlər 900-1 062 azn dəyərində qiymətləndirilir. Bu qiymətlərdən daha bahalı olan prosedurlar da mövcuddur.
Mövzuyla bağlı stomatoloqlar arasında sorğu keçirtdik. Özəl klinikalarda minimum müalicə qiyməti 80 manatdan başlayır. Lüks klinikada mikroskopla işləyən həkimlər isə plombu 300-400 manata qoyurlar.
Həkimlər Pravda.az-a açıqlamasında kanal müalicəsinin baha olmasını istifadə edilən materiallarla əlaqələndiriblər: “Protokola uyğun istifadə edilən sistemlər, məhlullar dəyişir, bu da qiymətə təsir edir və hər diş kanalının ayrı qiyməti olur. Qiymətlər bahalaşır, bu da ümumi müalicə qiymətinə təsir edir. Bununla yanaşı, ucuz, amma keyfiyyətsiz plomblar da olur”.
Həkimlər firmaların hər keçən gün qiyməti artırdığını bildiriblər. Onlar adi 3 manata aldıqları əkcək qutusunu hazırda 8 manata aldıqlarını dilə gətiriblər: “Firmalar da qiyməti artırdığı üçün bu, istifadə edilən materiallara təsir göstərir. Həkim öz cibindən material alırsa, təbii ki, ucuz edə bilməz. Poliklinikalarda da müalicə bahalıdır”.
Onlar TƏBİB nümayəndələri ilə görüş keçirdiklərini və aktiv olaraq müzakirələrin getdiyini qeyd ediblər: “Biz də arzu edirik ki, stomatoloji prosedurlar sığortaya daxil edilsin. Ən azı uyğun qiymətə olarsa, hər büdcəyə sahib insanlar yararlana bilərlər. Elə insan var 500 manat maaş alır. O insan necə gedib 100 manata dişinə plomb qoydursun?”.
Vətəndaşlar isə stomatoloji prosedurlar üçün standart qiymət tətbiqinin tərəfdarıdırlar.
Məsələ ilə bağlı İcbari Tibbi Sığortadan Pravda.az-a bildirilib ki, vətəndaşlar İcbari Tibbi Sığortanın saytına daxil olaraq (its.gov.az) qiymətlər barədə məlumat ala bilərlər: “Sayta daxil olduqdan sonra burada qanunvericilik hissəsində aşağıda tibbi xidmətlərin siyahısı və tarifləri bölməsi var. Keçid edərək xidmətlər zərfinə daxil olmayan ödənişli əsaslarla göstərilən tibbi xidmətlərin siyahısı və tarifləri hissəsi var. Vətəndaşlar orada bütün sığorta ilə icra edilməyən xidmətlərin məbləği ilə tanış ola bilərlər. Oradakı qiymətlər bütün stomotoloji xidmətlər göstərən dövlət xəstəxanalarında standart qiymət hesab edilir. Dövlət xəstəxanalarında işləyən həkim orada qeyd edilən qiymətdən kənara çıxıb başqa qiymət deyərsə bu qanun pozuntusu hesab edilər”.
İcbari Tibbi Sığortadan onu da qeyd ediblər ki, stomatoloji prosedurlar sığortaya daxil xidmətlər sırasında deyil: “Nazirlər Kabinetinin 5 saylı qərarına əsasən xidmətlər zərfimizə daxil deyil. Stomatoloji xidmətlər sığorta tərəfindən qarşılanmır. Hazırda buna dair hansısa yenilik yoxdur”.
Şəhanə Quliyeva
