Bakı, 28 noyabr, AZƏRTAC
Azərbaycan və Türkiyə arasında sənət sahəsində çox dəyərli əməkdaşlıq mövcuddur. Bakıda gənclərin bu sahəyə həvəsi, enerjisi və baxışındakı yenilik mənə də ilham verir. Sərgimin məhz Bakıda açılması mənim üçün xüsusi anlam daşıyır. Burada nümayiş olunan əsərlərin bəzilərini Vaşinqtonda, bəzilərini isə Bakıda ərsəyə gətirmişəm. Hər biri mənim sənət yolumun ayrı-ayrı mərhələlərini əks etdirir.
Bunu AZƏRTAC-a açıqlamasında noyabrın 28-də “Bakı” Rəsm Qalereyasında açılan “Payız yarpaqları” sərgisinin müəllifi, türkiyəli rəssam Zəkiyə İnan deyib.
Sərginin ərsəyə gəlməsində əsas ilham mənbəyinin payızın özü olduğunu bildirən rəssam deyib: "Payız mənim üçün sadəcə fəsil deyil, bir döngüdür. Yarpaqlar tökülür, torpağa qarışır, gübrəyə çevrilir və sonra yenidən bir ağacın yaranmasına zəmin yaradır. Bu proses həyatın davamlılığını göstərir. Mənim üçün payızı sadəcə sevdirmək yox, onun ruhunu, içindəki sakit yenilənmə enerjisini anlatmaq daha vacibdir. Əsərlərimdə də məhz bu döngünün, bu sakit yenilənmənin enerjisini əks etdirməyə çalışmışam."
