Dövlət Turizm Agentliyinin dəstəyi ilə həyata keçirilən və “Alternativ” Kommunikasiya və Tədqiqatlar İctimai Birliyi tərəfindən icra olunan “4 mövsüm Qrız” layihəsi uğurla yekunlaşıb.
Bizim.Media xəbər verir ki, Quba rayonunun Qrız kəndində həyata keçirilən layihənin sonuncu təlimində qadın iştirakçılar üçün aqroturizm mövzusunda praktiki biliklər təqdim olundu, turizm yönümlü biznesin əsasları izah edildi.
Layihə rəhbəri, “Alternativ” Kommunikasiya və Tədqiqatlar İctimai Birliyinin sədr müavini Jalə Quliyeva layihənin bölgədə dayanıqlı turizm və qadın təşəbbüskarlığının inkişafına xidmət etdiyini bildirdi:
“Bu layihə ilə biz Qrız kəndində qadınların turizm sahəsində fəallaşmasını və öz kiçik bizneslərini qurmaq imkanlarını dəstəklədik. Layihə ərzində yerli resurslara əsaslanan, dörd mövsüm davamlı ola biləcək turizm fəaliyyətlərinə fokuslandıq”.
Quba Regional Turizm İdarəsinin baş mütəxəssisi Azər Səfərov bölgənin turizm potensialına diqqət çəkərək qeyd etdi:
“Qrız kəndi təkcə təbiəti ilə deyil, həm də yerli icmanın fəallığı ilə seçilir. Bu cür layihələr sayəsində yerli əhalinin, xüsusilə də qadınların turizm sahəsinə cəlb olunması, onların bu sahədə bilik və bacarıqlarla təmin edilməsi uzunmüddətli inkişaf üçün vacib şərtlərdən biridir”.
Tədbirdə təlimçi, turizm üzrə mütəxəssis Vüqar Dərgahov aqroturizm fəaliyyətlərinin biznes yönümlü təşkili barədə iştirakçılara ətraflı məlumat verdi:
“Aqroturizm təkcə fermerlik deyil, bu, kənd həyatını və yerli mədəniyyəti turizm məhsuluna çevirməkdir. Qrız kəndi bu baxımdan çox unikal imkanlara sahibdir və düzgün planlama ilə bu imkanlar gəlirli fəaliyyət sahəsinə çevrilə bilər”.
Vüqar Dərgahovun təqdimatında “Qrız kəndində aqroturizm fəaliyyətlərinin biznes planı” mövzusunda təlimdə iştirakçılar biznes planlaşdırma mərhələləri, məhsul seçimi, qiymət formalaşdırılması, xidmət keyfiyyəti və bazara çıxış yolları barədə məlumatlandırıldılar. Təlim iştirakçılarına biznes planların hazırlanmasına dəstək göstərildi.
Sessiya sonunda sual-cavab və müzakirələr aparıldı, daha sonra iştirakçılara təlimdə iştirak etdiklərinə dair sertifikatlar təqdim olundu.
“4 mövsüm Qrız” layihəsi çərçivəsində 3 ay ərzində keçirilən təlimlər, praktiki sessiyalar və qadın yönümlü təşviq proqramları Qrız kəndində sosial-iqtisadi fəallığı artırmağa xidmət etdi.
Layihənin nəticəsi olaraq yerli qadınlar turizm sahəsində ilkin biznes bilikləri əldə etdilər, kəndin turizm potensialı yerli icma üzvləri tərəfindən daha yaxından tanındı, aqroturizm, ekoturizm və etnoturizm sahələrində fəaliyyət imkanları araşdırıldı. Layihənin sonunda iştirakçılar qrup halında “4 mövsüm Qrız” adlı vahid brend adı altında turizm yönümlü təşəbbüslərini təqdim etdilər.
Bizim.Media
