Rusiya Xarici İşlər Nazirliyi Avropa İttifaqının (Aİ) yeni sanksiyalarına cavab olaraq bəzi Avropa nümayəndələrinə ölkəyə giriş qadağası tətbiq edildiyini açıqlayıb.
Nazirliyin açıqlamasında Aİ-nin 23 oktyabrda Rusiyaya qarşı 19-cu sanksiya paketini təsdiqlədiyi xatırladılıb.
Bunun “qanunsuz” və “düşməncəsinə” olduğu vurğulanaraq “Buna cavab olaraq Rusiya tərəfi Brüsselin Rusiyaya qarşı siyasətinə uyğun davranan Avropa qurumları, Aİ üzv ölkələri və bəzi Avropa dövlətlərinin nümayəndələrini əhatə edən sanksiya siyahısını əhəmiyyətli dərəcədə genişləndirib. Bu siyahıdakı şəxslərin Rusiyaya girişi qadağandır” deyə bildirilib.
Açıqlamada qeyd olunub ki, siyahıya hüquq-mühafizə orqanları, dövlət və kommersiya qurumlarının əməkdaşları, həmçinin Aİ üzv ölkələri və bəzi Qərb ölkələrinin vətəndaşları daxildir. Bu şəxslərin Rusiya əleyhinə fəaliyyət göstərdiyi və Ukraynanı dəstəklədiyi vurğulanıb.
Sanksiya siyahısına daxil edilmiş şəxslərin sayı açıqlanmayıb.
