Əbülfəz Qurbanlının son paylaşımı illərdir “müxalifət lideri” obrazında təqdim olunan, amma əslində nə ölkəyə, nə də öz tərəfdarlarına fayda verə bilməyən Əli Kərimlinin və onun yaratdığı sistemin iflasını açıq şəkildə göstərir.
O, 2003-cü ildən bəri bu proseslərin içində olmuş, illərlə Əli Kərimlinin yanında mübarizə aparmış bir adam kimi indi etiraf edir ki, “bizim nəsil heç nəyə nail ola bilmədi”.
Bu, sadəcə şəxsi məyusluq deyil - bu, AXCP modelinin, Əli Kərimlinin yaratdığı qapalı, avtoritar müxalifət sisteminin tam iflasının göstəricisidir.
Əli Kərimli illər boyu özünü “xalqın səsi”, “demokratiya mübarizi” kimi təqdim etdi, amma əslində ətrafındakı insanları şəxsi siyasi oyunlarının alətinə çevirdi. Nəticədə, Qurbanlının da yazdığı kimi, biri həbsdə qaldı, biri mühacirətə getdi, digəri isə “növbəsini gözləyir”.
Ən acınacaqlısı isə odur ki, bu insanların çoxu illərlə inanıb, ailəsindən, gəncliyindən keçib, amma heç bir real dəyişiklik görməyib.
Qurbanlının statusundan belə çıxır ki, Əli Kərimlinin rəhbərlik etdiyi müxalifət düşərgəsi ölkəyə ideya, birlik, plan gətirmədi. Əvəzində, hər kəsi bir “Həsən-Hüseyn savaşına” soxdu, illərlə nifrət və qarşıdurma üzərində siyasət qurdu.
Cəmiyyətin enerjisi nəticəsiz mitinqlərə, sosial şouya, “Facebook mübarizəsinə” xərcləndi.
Əbülfəz Qurbanlının etirafı həm də bir dönüm nöqtəsidir - çünki bu, artıq tənqidçilərin yox, sistemin içində olmuş insanların dilindən səslənir. Onlar da anlayırlar ki, Əli Kərimlinin xətti nə dəyişiklik gətirdi, nə də gələcək ümid buraxdı.
Bu gün Əli Kərimlinin ətrafında qalan azsaylı insanlar isə sanki eyni təkəri fırladan köhnə mexanizmi xatırladır: nə yeni ideya, nə dinamika, nə də xalqla real təmas var.
Əbülfəz Qurbanlının yazdığı kimi, “biz bu ölkə üçün yanan, inanan adamlar olaraq heç nəyə nail ola bilmədik.” Bunun əsas səbəbi isə aydındır: illərlə bir liderin şəxsi ambisiyalarına bağlanmış, daxildən tənqid qəbul etməyən, dəyişməyə qapalı bir müxalifət.
Əslində, Əbülfəz Qurbanlının yazısı həm də bir mesajdır - dəyişiklik üçün əvvəlcə köhnə, tükənmiş modellərdən imtina etmək lazımdır. Əli Kərimli kimi 30 ildir eyni ritorikanı təkrarlayan, amma nəticə göstərə bilməyən siyasətçilərlə ölkə nə dəyişəcək, nə də irəli gedəcək.
Musavat.com
