BAKI, 21 noyabr. TELEQRAF
Qobustan rayonunda ucadan söyüş söyən şəxs həbs edilib.
Teleqraf-ın əldə etdiyi xəbərə görə, hadisə noyabrın 19-da Qobustan şəhərində yerləşən “Son” adlanan ərazidə baş verib.
Xaçmaz rayon sakini, 1984-cü il təvəllüdlü Asim Bağırov (ad-soyad şərti verilib – red.) marketdən çıxdıqdan sonra uca səslə ünvansız nalayiq ifadələr işlədib.
Bu zaman orada xidmət aparan polis əməkdaşları ona yaxınlaşaraq intizamlı olmağa dəvət ediblər. Lakin o, polisin qanuni tələbinə tabe olmayıb, öz hərəkətlərini davam etdirib.
Onun barəsində İnzibati Xətalar Məcəlləsinin 510 (xırda xuliqanlıq) və 535.1-ci (polisə tabe olmama) maddələri ilə ittiham elan edilib.
İş üzrə izahat verən A. Bağırov bildirib ki, noyabrın 19-da Şamaxıdan qayıdarkən Qobustan şəhərində mağazanın yanında avtomobilini saxlayıb: “Mağazaya girib-çıxdıqdan sonra telefonda mənə 150 manat borclu olan şəxslə mübahisə etdiyimə görə əsəbiləşdim, söyüş söydüm. Bu zaman kənarda olan polis əməkdaşları yaxınlaşıb ictimai yerdə olduğunu və nalayiq ifadələrə son verməyimi tələb etsələr də, polisin həmin tələbinə tabe olmadım. Hazırda əməlimdən peşmanam, barəmdə yüngül inzibati tənbeh tədbiri tətbiq edilməsini xahiş edirəm”.
Qobustan Rayon Məhkəməsinin hökmü ilə təqsirləndirilən şəxs 12 gün müddətinə inzibati qaydada həbs edilib.
