Əmək və Əhalinin Sosial Müdafiə Nazirliyinin tabeliyində Dövlət Tibbi-Sosial Ekspertiza və Reabilitasiya Agentliyinin təşəbbüsü və “Eşitmə və Nitq Məhdudiyyətli Şəxslərə Sosial Yardım” İctimai Birliyinin birgə təşkilatçılığı ilə maarifləndirmə tədbiri keçirilib.
QHT.az xəbər verir ki, əlilliyi olan uşaqlar üçün 3 nömrəli xüsusi internat məktəbində keçirilən təlimdə müəssisədə təhsil alan yuxarı sinif şagirdləri, həmçinin valideynlər və məktəbin işçi heyəti iştirak ediblər.
Tədbirin əsas məqsədi “Səsiniz olaq!” onlayn surdo-tərcümə xidməti haqqında geniş məlumat vermək, bu xidmətin əlçatanlıq və funksionallıq imkanlarını auditoriyaya çatdırmaqdır. Xidmət eşitmə və nitq məhdudiyyətli şəxslərin müxtəlif dövlət qurumlarına, tibb müəssisələrinə və digər vacib sahələrə müraciətlərini asanlaşdıraraq onların sosial inteqrasiya imkanlarını genişləndirir.
Bundan əlavə, tədbir çərçivəsində valideynlər üçün psixoloji dəstək, sağlam ünsiyyət bacarıqları, uşaqlarla emosional təmasın düzgün qurulması və gündəlik çətinliklərin öhdəsindən gəlmək üçün praktik tövsiyələr təqdim olunub. Eyni zamanda iştirakçılar üçün etik yardım davranış qaydaları – eşitmə məhdudiyyətli şəxslərlə ünsiyyətdə düzgün yanaşmalar, onlara hörmət və dəstək mədəniyyətinin formalaşdırılması kimi mühüm mövzular izah edilib.
Bu təşəbbüs dövlət qurumları və QHT əməkdaşlığının uğurlu nümunəsi kimi xüsusi internat məktəblərində inklüzivlik, məlumatlılıq və dəstək sistemlərinin gücləndirilməsinə xidmət edən əhəmiyyətli addımdır.
