GlobalInfo saytından verilən məlumata görə, ain.az xəbər verir.
Samux rayonunda qoyunun döyülməsi və görüntülərin çəkilərək sosial şəbəkələrdə yayılması geniş ictimai narazılığa səbəb olub.
Heyvana işgəncə verən şəxsi qanunla hansı cəzalar gözləməlidir?
Globalinfo.az-a danışan hüquqşünas Ellada Bayramova deyib ki, “Heyvanların mühafizəsi haqqında” Qanun heyvanlara əzab verilməsi, işgəncə olunması və qəddar rəftarın bütün formalarını qadağan edir:
“Qanunun 7-ci maddəsinə əsasən heyvanlara işgəncə vermək və onlara qəsdən əzab yetirmək hüquqi məsuliyyət yaradır. Bu müddəa həmin hadisənin hüquqi qiymətləndirilməsi üçün əsas normativ bazanı təşkil edir. Əgər hərəkət ağır nəticələr doğurmursa, məsuliyyət İnzibati Xətalar Məcəlləsi üzrə tətbiq edilə bilər. Heyvanlara qəddar rəftar maddəsinə əsasən, fiziki şəxslər 100–200, vəzifəli şəxslər 400–600, hüquqi şəxslər isə 1000–1500 manat məbləğində cərimə edilir”.
Ellada Bayramova
Hüquqşünas bildirib ki, Samuxdakı hadisə mövcud tərkibə görə yalnız cərimə ilə məhdudlaşmaya bilər:
“Heyvana işgəncə nəticəsində onun öldürülməsi, xəstələnməsi və ya şikəst edilməsi baş veribsə, məsuliyyət Cinayət Məcəlləsinin (CM) 274-1-ci maddəsi üzrə müəyyən edilir. Bu maddəyə əsasən, 200–400 saat ictimai iş və ya 1 ilədək azadlıqdan məhrumetmənin tətbiqi mümkündür. Eyni zamanda hadisənin videoya çəkilərək sosial mediada yayılması cəmiyyətə qarşı hörmətsizlik, qanun pozuntusunun təşviqi, qəddarlığın təbliği kimi halları ehtiva etdiyindən (CM) 61-ci maddəsinə əsasən ağırlaşdırıcı hal hesab edilə bilər. Heyvan sahibi hüquqları pozulduğu üçün Mülki Məcəlləyə əsasən maddi ziyanın ödənilməsini də tələb edə bilər. Əgər psixoloji zərər sübuta yetirilərsə, mənəvi ziyanla bağlı iddia qaldırmaq olar”.
Ellada Bayramovanın sözlərinə görə, Samuxda baş verən hadisə hüquqi baxımdan inzibati xəta deyil, cinayət xarakterli əməl kimi qiymətləndirilməlidir:
“Həm işgəncə faktı, həm görüntülərin paylaşılması, həm də ictimai əxlaqın təhqiri hadisənin təhlükəlilik dərəcəsini artırır. Heyvanlara işgəncə ilə bağlı cinayət məsuliyyəti sərtləşdirilməli, azadlıqdan məhrumetmə müddəti artırılmalıdır. Təhsil müəssisələrində heyvanlara münasibətdə etika mövzuları tədris edilməlidir. Qeyri-hökumət təşkilatları ilə birgə monitorinq və nəzarət mexanizmləri gücləndirilməlidir. Media platformalarında zorakılığın təbliğinə qarşı sanksiya tədbirləri sərtləşdirilməlidir”.
Qeyd edək ki, Samuxda heyvana işgəncə verən V. Bayramquliyev tutulub. Şəxs saxlanılaraq polis şöbəsinə gətirilib və barəsində qanunamüvafiq tədbir görülüb.
Ləman İmran
Globalinfo.az
Ən son xəbərləri və yenilikləri almaq üçün ain.az saytını izləyin.
