“Ferrari”nin pilotu Şarl Lekler Las-Veqas Qran-Prisində göstərdiyi nəticəni dəyərləndirib.
90deqiqe.Az-ın məlumatına görə,"Sky Sports" 28 yaşlı sürücünün dediklərini belə çatdırıb.
“Heç nəyi tam dəqiq deyə bilmirəm, amma strategiya ilə bağlı narahatlığım var idi. Elə bil nəsə düzgün etməmişdik. Oskar məndən arxada idi, lakin onun ‘undercut’ı alındı. Başqa maşınlarda da vəziyyət oxşar idi, məsələn, Antonelli. Çox təəssüf ki, xüsusi bir nəticə qazanmaq imkanını itirdik”.
Pilot bildirib ki, yarışın ilk hissəsində yüksək hava müqaviməti səbəbindən ötmə şansı demək olar ki, olmayıb:
“Oskarın qarşısında idim, amma o, Kimidən ‘DRS’ alırdı. Belə şəraitdə ötmək demək olar ki, mümkün deyildi, risk etməli oldum. İkinci hissədə isə Oskarı keçmək artıq real deyildi – çox sürətli idi. Buna görə də məyus oldum”.
Lekler yağışlı havada temp problemlərinin hələ də qaldığını vurğulayıb:
“Altıncı yer istədiyim nəticə deyil. Yağışlı hava şəraitində sıralanma çox çətin keçdi. Yaş trasda sürətimiz üzərində ciddi işləməliyik, çox vaxt geridən gəlməli oluruq və bu, bizə xal itkisi yaradır”.
Qeyd edək ki, yarışı 6-cı pillədə başa vuran monaqask sürücü “Maklaren” pilotlarının diskvalifikasiyasından sonra 4-cü yerə yüksəlib.
