Varşava: Yad Vaşem Polşanın nasist Almaniyası tərəfindən işğal olunduğunu açıq göstərməlidir…
Poliqon xəbər verir ki, Polşanın Xarici İşlər Nazirliyi Holokost memorial institutu Yad Vaşem tərəfindən sosial şəbəkədə edilən paylaşım səbəbilə İsrailin Varşavadakı səfirini nazirliyə dəvət edib. Reuters Agentliyinin məlumatına görə, Polşa tərəfi paylaşımda İkinci Dünya müharibəsi zamanı yəhudilərə sarı ulduz taxmağı məcbur edənlərin Polşa hakimiyyəti deyil, nasist Almaniyasının işğal qüvvələri olduğunu kifayət qədər aydın vurğulanmadığını bildirir.
Polşanın xarici işlər naziri Radoslav Sikorski bildirib ki, Yad Vaşem-in bazar günü yayımladığı posta əsasən, Polşa yəhudilərin “cəmiyyətdən təcrid olunması üçün fərqləndirici nişan taxmağa məcbur edildiyi ilk ölkə” kimi təsvir olunub. Sikorskinin sözlərinə görə, paylaşımda birbaşa qeyd edilməli idi ki, həmin dövrdə Polşa Almaniya tərəfindən işğal altında olub.
“Çünki yayılmış yanlış məlumat düzəldilmədi, mən İsrail səfirini XİN-ə çağırmaq qərarı verdim”, deyə nazir əlavə edib.
“Bir çox istifadəçinin vurğuladığı və məqalədə açıq şəkildə göstərildiyi kimi, bu, Almaniya rəhbərliyinin əmri ilə həyata keçirilmişdi”, deyə tənqidlərdən sonra Yad Vaşem paylaşımı yenidən yayımlayaraq qeyd edib
Yad Vaşemin rəhbəri Dani Dayan da bəyan edib ki, institutun materiallarında Polşanın nasist Almaniyası tərəfindən işğal edildiyi faktı dəqiq şəkildə əks olunur və başqa cür şərh bu qurumun tarixi dəqiqliyə sadiqliyini yanlış anlamaq deməkdir.
Polşa 1939–1945-ci illərdə nasist Almaniyası tərəfindən işğal olunmuşdu. Müharibə dövründə ölkədə yaşayan 3,2 milyon yəhudidən 3 milyondan çoxu Holokost zamanı öldürülüb. Bu, Avropada həyatını itirən yəhudi əhalinin təxminən yarısını təşkil edib.
Polşada Holokost mövzusu həssas siyasi məsələ olaraq qalır və Varşava beynəlxalq diskursda Polşanın nasist cinayətlərinə şərik kimi göstərilməsinə qarşı sərt mövqedədir.
Poliqon.info
