Avropa İttifaqında (Aİ) avtomobil satışları bu ilin oktyabrında ötən ilin eyni dövrü ilə müqayisədə 5,8 faiz artıb.
Yeniavaz.com xəbər verir ki, Avropa Avtomobil İstehsalçıları Assosiasiyasının (ACEA) məlumatına görə, Aİ ölkələrində qeydiyyata alınan yeni minik avtomobillərinin sayı ötən ilin oktyabrındakı 866,1 min ədəd səviyyəsindən bu ilin eyni ayında 916,6 min ədədə yüksəlib.
İspaniyada satışlar 15,9, Almaniyada 7,8, Fransada 2,9 faiz artıb, İtaliyada isə 0,5 faiz azalma qeydə alınıb. Aİ-yə əlavə olaraq İslandiya, Norveç, İsveçrə və Böyük Britaniyanı əhatə edən geniş Avropa bazarında da satışlar 4,9 faiz artaraq 1,09 milyon ədədə çatıb. Böyük Britaniyada isə oktyabrda satışlar 0,5 faiz artımla 144 min 950 avtomobil təşkil edib.
Elektrik avtomobilləri üzrə göstəricilər daha yüksək dinamika nümayiş etdirib. Oktyabr ayında Aİ-də elektrikli nəqliyyat vasitələrinin satışı 38,6 faiz artaraq 173 min 170 ədədə yüksəlib. Yanvar–oktyabr dövründə elektrik avtomobillərinin ümumi satışlardakı payı ötən ildəki 13,2 faizdən 16,4 faizə çatıb.
Avtomobil istehsalçıları arasında satış artımı fərqli olub. “Volkswagen Qrup”un Aİ-də satışı 7,9 faiz, “Stellantis”in 6,6 faiz, “Renault”un isə 10 faiz yüksəlib. Almaniyanın premium avtomobil markalarından BMW-nin tədarükləri 8,7 faiz, “Mercedes-Benz”in isə 2 faiz artıb. “Toyota Qrup”un satışları 10,8 faiz artdığı halda, ABŞ istehsalçısı “Ford”un satışları 8,8 faiz azalıb. Cənubi Koreyanın “Hyundai Group” şirkəti isə satışı cüzi – 0,1 faiz artırıb.
Elektrikli avtomobil markaları arasında “Tesla” oktyabr ayında Aİ-də ciddi geriləmə ilə üzləşib – şirkətin satışları 48 faiz azalaraq 5650 avtomobilə düşüb. Çin istehsalçısı BYD isə əksinə, satışlarını təxminən üç dəfə artıraraq 13 min 350 ədədə çatdırıb.
Yanvar–oktyabr aylarının yekunlarına görə, Avropa İttifaqında ümumi avtomobil satışı 1,4 faiz artaraq 8,974 milyon ədəd olub.

Elnur Əli