Berlin, 25 noyabr, AZƏRTAC
Almaniya paytaxtında Körber Fondunun təşkilatçılığı ilə ənənəvi Berlin Xarici Siyasət Forumu keçirilir.
AZƏRTAC xəbər verir ki, Almaniya hökumətinin üzvləri, tanınmış siyasətçilər və ekspertlərin qatıldıqları Forumun gündəliyində Almaniyanın xarici siyasətinin qarşısında duran əsas hədəflər - Almaniya və Avropanın təhlükəsizlik, daxili siyasət və iqtisadi çağırışları beynəlxalq öhdəliklərlə uzlaşdırması yolları, Avropanın güclü qlobal oyunçusu kimi Almaniyanın mövqeyini gücləndirmək üçün atmalı olduğu addımlar, eləcə də qlobal aktorların hazırkı gərgin geosiyasi mühitdə dayanıqlı tərəfdaşlıqlar qurmaq imkanları mövzuları yer alıb.
Forumun açılışında çıxış edən Almaniyanın xarici işlər naziri Yohan Vadeful Almaniyanın və Avropanın həm dərinləşən qlobal böhranlar, həm də daxili siyasi qütbləşmə və iqtisadi çətinliklərlə üzləşdiyini vurğulayıb və qarşıda duran hədəflərdən danışıb.
Tədbirdə xüsusilə geosiyasi rəqabət mühitində daxili və xarici siyasətin beynəlxalq münasibətlərin formalaşmasındakı rolu və Almaniya ilə Avropanın qarşılaşdığı çağırışlar müzakirə olunur. Həmçinin Almaniya və Avropanın çağırışlara effektiv cavab vermək üçün tərəfdaşlıqları gücləndirməsi və sabitliyi təşviq edən yanaşmaların önəmi vurğulanır.
Qeyd edək ki, Körber Fondunun və Almaniya Xarici İşlər Nazirliyinin birgə təşkil etdiyi ənənəvi forum 2011-ci ildə təsis olunub. Forumun məqsədi Almaniya və Avropa üçün xarici siyasət çağırışlarını müzakirə etmək, siyasətçilər, hökumət nümayəndələri, ekspertlər və media ilə dialoq yaratmaqdır.
AZƏRTAC-ın xüsusi müxbiri
Berlin
