Mübariz Göyüşlü: “Türk dünyasına aid toplantılardan sonra ortaq layihələrin gerçəkləşdirilməsi, həyata keçirilməsi lazımdır, bunun üçün ilk olaraq maliyyə tələb olunur”
Azərbaycan Prezidenti İlham Əliyev Bakıda keçirilən Türk Dövlətləri Təşkilatına üzv ölkələrin qeyri-hökumət təşkilatlarının həmrəylik forumunun iştirakçılarına müraciət edib.
Müraciətdə qeyd edilən məsələlərdən biri Azərbaycanın Türk Dövlətləri Təşkilatına (TDT) üzv ölkələrlə ikitərəfli və çoxtərəfli əsasda QHT-lər üçün tarix, mədəniyyət, ekologiya, iqlim siyasəti və digər sahələrdə ortaq qrant müsabiqələri elan etməyə, qarşılıqlı kommunikasiyanı gücləndirən layihələri dəstəkləməyə hazır olduğudur. Azərbaycan Prezidenti bildirib ki, 2026-cı ildə 100 illiyi keçiriləcək Birinci Türkoloji Qurultayın türk xalqlarının mədəni inteqrasiyası məsələləri ilə bağlı yarımçıq qalmış işlərinin QHT-lərin yaxından iştirakı ilə müasir çağırışlara uyğun davam etdirilməsi də xüsusi aktuallıq kəsb edir.
“Birgə qrant müsabiqələri türk dünyasının inkişafına səbəb olan, gərəkli mövzular üzrə müsabiqələr elan etməyə imkan yaradar”
Türk dünyasına üzv QHT-lərin birgə qrant müsabiqələrinin keçirilməsinin əhəmiyyəti haqqında fikir bildirən "Müasir İnkişaf" İctimai Birliyinin sədri, siyasi şərhçi Mübariz Göyüşlü “Bakı-Xəbər”ə açıqlamasında qeyd etdi ki, türk dünyasına aid bütün toplantıların, müzakirələrin keçirilməsi müsbət qiymətləndirilməlidir: “Bu kimi toplantılardan sonra ortaq layihələrin gerçəkləşdirilməsi, həyata keçirilməsi lazımdır. Təbii ki, bunun üçün ilk olaraq maliyyə tələb olunur. Birgə qrant müsabiqələri türk dünyasının inkişafına səbəb olan gərəkli mövzular üzrə müsabiqələr elan etməyə imkan yaradar. Bu cür layihələr, çalışmalar, fəaliyyətlər türk dünyasının birliyinə çox böyük töhfələr bəxş edər. Məlumat üçün deyim ki, bizim təşkilat da türk dünyasının birliyi, inkişafı ilə bağlı çoxlu sayda layihələr həyata keçirib. Hesab edirəm ki, vətəndaş cəmiyyəti təşkilatları gələcəkdə bu kimi imkanlardan istifadə edib, türk dünyasının birliyinə daha çox fayda verər”.
Günel CƏLİLOVA
