Ermənistan–Azərbaycan sülh sazişinin imzalanmasının tarix hələ də qeyri-müəyyən qalır.
İnterpress.az xəbər verir ki, bunu jurnalistlərə açıqlamasında Ermənistan xarici işlər nazirinin müavini Mnatsakan Safaryan bildirib.
Ermənistan və Azərbaycan arasında sülh sazişinin imzalanması ilə bağlı danışıqlar davam edir, lakin hələlik konkret tarix müəyyən olunmayıb.
Onun sözlərinə görə, tərəflər arasında təmaslar fasiləsiz davam edir və proses dayandırılmayıb.
Safaryan qeyd edib ki, delimitasiya prosesi iki ölkənin müvafiq komissiyalarının rəhbərləri səviyyəsində aparılır.
“Bu prosesdə baş verən bütün yenilikləri mütəmadi olaraq rəsmi məlumatlar vasitəsilə ictimaiyyətə çatdırırıq”, – o vurğulayıb.
Jurnalistlərin Sünik (Zəngəzur -red.) istiqamətində delimitasiya işlərinin davam edib-etməyəcəyi ilə bağlı sualını cavablandıran XİN müavini bildirib ki, hər hansı yeni inkişaf olarsa, bu barədə mütləq məlumat veriləcək.
Sülh sazişinin mümkün imzalanma tarixlərinə münasibət bildirən Safaryan isə hazırda konkret vaxt açıqlaya bilməyəcəyini qeyd edib.
Xuraman Etibarlı
İnterpress.az
