Bakı, 26 noyabr, AZƏRTAC
Azərbaycan altı ölkə ilə diplomatik və xidməti pasport sahiblərini vizadan qarşılıqlı azad edir. Bu ölkələr Anqola, Bəhreyn Krallığı, Cibuti, Dominikan, Qvineya-Bisau və Surinamdır. Artıq bu məsələ Milli Məclisdə müzakirə edilib və qəbul olunub. Burada söhbət qarşılıqlı rəsmi səfərlərin sadələşdirilməsi, dövlətlərarası münasibətlərin gücləndirilməsi, diplomatik və işgüzar fəaliyyətlərin asanlaşdırılmasından gedir. Beynəlxalq təcrübədə də vizasız səfər ölkələr arasında siyasi, iqtisadi və mədəni sahələrdə əməkdaşlığı dərinləşdirir.
Bu sözləri AZƏRTAC-a açıqlamasında Milli Məclisin deputatı Nigar Məmmədova deyib.
O bildirib ki, ölkələr arasında diplomatik və xidməti pasport sahiblərinin vizadan azad olunması bir neçə baxımdan çox əhəmiyyətlidir. Bu addım dövlətlərarası əlaqələri həm siyasi, həm də praktiki səviyyədə gücləndirir. Vizadan azad olunma diplomatik və rəsmi nümayəndələr arasında görüş və danışıqların daha çevik təşkilinə imkan yaradır, vaxt itkisini aradan qaldırır. Beynəlxalq tədbirlərdə daha səmərəli iştirak və əməkdaşlığı təmin edir. Asiya, Afrika, Latın Amerikası kimi müxtəlif coğrafiyalarda yerləşən bu ölkələrin hər biri Azərbaycanla münasibətlərin inkişafında maraqlıdırlar.
“Mən xüsusilə Afrika ölkələri ilə Azərbaycan arasında son vaxtlar münasibətlərin inkişafına diqqəti çəkmək istərdim. Məlum olduğu kimi, Azərbaycan nüfuzlu ölkə, etibarlı tərəfdaş kimi Afrika dövlətlərinin də diqqətini cəlb edir. Azərbaycanın inkişaf modeli Afrika ölkələri üçün də maraqlıdır. Afrika istehlak mallarının istehsalından tutmuş kənd təsərrüfatına, təbii sərvətlərin çıxarılmasına, infrastrukturun genişləndirilməsinə və sənaye istehsalına qədər bir çox sektorda inkişaf imkanları təklif edir. Son vaxtlar Afrika ölkələrinin rəhbərlərinin ölkəmizə ardıcıl səfərləri bunu təsdiqləyir. Yəni, qitə ölkələri Azərbaycanla prioritet sahələr üzrə əməkdaşlığı daha da dərinləşdirməkdə maraqlıdır. Eyni zamanda, Azərbaycanın bu qitəyə investisiya yatırmasına maraq göstərilir, - deyə deputat qeyd edib.
N.Məmmədova, həmçinin vurğulayıb ki, Azərbaycan Respublikası Hökuməti ilə Maldiv Respublikası Hökuməti arasında isə ümumvətəndaş pasport sahiblərinin viza tələbindən qarşılıqlı azad edilməsi nəzərdə tutulur. Azərbaycan və Maldiv arasındakı sözügedən beynəlxalq müqavilə vətəndaşların qarşılıqlı gediş-gəlişinin sadələşdirilməsi ilə bağlı hüquqi əsas yaradır. Bu da qarşılıqlı şəkildə turizmin, bütövlükdə humanitar əlaqələrin inkişafına töhfə verəcək.
