Fransada rusiyayönlü mövqeyi ilə tanınan humanitar təşkilat “SOS Donbass”ın rəhbər şəxsləri dövlətə qarşı casusluq işi üzrə saxlanılıb.
Musavat.com xəbər verir ki, bu barədə “Le Parisien” və “France 24” saytlarında məlumat yayıb.
Bildirilir ki, həbs olunanlar arasında qurumun təsisçisi hesab edilən Anna N., təşkilatın hazırkı prezidenti Vensan P., həmçinin üzv kimi tanınan Vyaçeslav P. yer alır.
“SOS Donbass” saytındakı rəsmi qeydiyyata əsasən, qurumun yaradıcısı Anna Novikova, prezident isə Vensan Perfettidir. Fransız mediası Vyaçeslav P-ni təşkilatın fəal üzvlərindən biri kimi təqdim edir.
İstintaq məlumatlarına görə, Novikovaya və Perfettiyə bir neçə maddə üzrə ittiham irəli sürülüb:
- xarici dövlətlə sövdələşmə;
- xarici dövlətin xeyrinə informasiya toplama fəaliyyəti;
- cinayətkar birlik quraraq cinayət hazırlığı.
Hər iki şəxs məhkəmə qərarı ilə həbs qətimkan tədbiri ilə cəzalandırılıb.
Vyaçeslav P. isə ictimai əmlakın korlanması və cinayətkar quruma qoşulmaqda təqsirləndirilir. Onun saxlanmasına səbəb kimi 2025-ci ilin sentyabrında Parisdəki Triumfalar Arkasında pro-Rusiya məzmunlu plakatlar yapışdırması göstərilir.
Anna Novikova ilə bağlı təhlükəsizlik qurumlarının müşahidəsi ən azı ilin əvvəlindən aparılırmış.
Saxlanma prosesi “SOS Donbass”ın fəaliyyətinin araşdırılması fonunda həyata keçirilib.
Fransanın Daxili Təhlükəsizlik Baş İdarəsi (DGSI) hesab edir ki, təşkilatın humanitar karvanları və ianə kampaniyaları əslində Rusiya lehinə kəşfiyyat fəaliyyəti üçün örtük mexanizmi ola bilər.
İş üzrə istintaq davam edir. Təşkilatın fəaliyyəti və mümkün əlaqələri geniş miqyasda yoxlanılır.
Musavat.com
