Bakı, 26 noyabr, AZƏRTAC
Qlobal iqtisadiyyatın sürətlə dəyişdiyi, rəqəmsallaşma, süni intellekt və təmiz enerji həllərinin önə çıxması fonunda Azərbaycan öz inkişaf modelini yenidən formalaşdırır.
AZƏRTAC xəbər verir ki, bunu iqtisadiyyat nazirinin müşaviri Rauf Nəcəfli Bakıda keçirilən 2-ci Beynəlxalq Xəzər İnvestisiya Forumunda çıxışı zamanı deyib.
Onun sözlərinə görə, ölkədə formalaşmış əlverişli biznes və investisiya mühiti beynəlxalq reytinq agentlikləri — “Moody’s”, “Fitch” və S&P tərəfindən yüksək qiymətləndirilir.
“Bu nəticələrin əldə olunmasında qeyri-neft sektorunun inkişafı mühüm rol oynayır. Dövlət qurumlarında proseslərin rəqəmsallaşdırılması və optimallaşdırılması ümumi iqtisadi göstəricilərin yüksəlməsinə ciddi təsir göstərir. Azərbaycan iqtisadiyyatının diversifikasiyası və qlobal rəqabətliliyinin artırılması məqsədilə Sənaye 4.0 yanaşması prioritet elan edilib. “Sənaye 4.0 hazırlıq proqramı” artıq icra mərhələsindədir. Proqram yerli müəssisələrdə yeni texnologiyaların tətbiqini, əməliyyat səmərəliliyinin artırılmasını və innovasiya potensialının gücləndirilməsini hədəfləyir”, - deyə Rauf Nəcəfli bildirib.
Nazirin müşaviri bildirib ki, transformasiyanı daha da sürətləndirmək üçün Sənaye 4.0 Mərkəzinin yaradılması prosesi gedir: “Bu mərkəz yalnız bina deyil, ideyaların formalaşdığı və qlobal innovasiyalarla yerli tələbat arasında körpü rolunu oynayan platforma olacaq. İqtisadiyyat Nazirliyi tərəfindən süni intellekt həllərinin tətbiqi üçün vacib olan superkompüter infrastrukturunun qurulmasına başlanılıb. Yeni infrastruktur sənayedə proseslərin optimallaşdırılması, enerji səmərəliliyi, prediktiv analitika və süni intellekt əsaslı idarəetmə mexanizmlərinin geniş tətbiqinə imkan yaradacaq”.
