Nigeriya Prezidenti Bola Əhməd Tinubu bildirib ki, ötən həftə ölkənin şimal-qərbindəki Kebbi əyalətində qaçırılan 24 məktəbli qızın hamısı azad edilib.
Tinubu açıqlamasında qeyd edib ki, noyabrın 17-əa Maqa şəhərindəki dövlət orta məktəbinə edilən hücumda qaçırılan bütün qızlar "təhlükəsiz şəkildə geri qaytarılıb".
Prezident xilasetmə əməliyyatının təfərrüatlarını açıqlamayıb. "24 qızın hamısının xilas edildiyini öyrənəndə çox rahatladım. İndi yeni qaçırılmanın qarşısını almaq üçün həssas bölgələrə əlavə qüvvələr göndərmək təcilidir", - deyə o əlavə edib.
Məktəbin direktoru Musa Rabi Maqaci əvvəlcə 25 şagirdin qaçırıldığını, lakin birinin hücum günü qaçmağı bacardığını açıqlayıb.
O bildirib ki, azad edilən qızlar hazırda hakimiyyət orqanlarının nəzarətindədir; onların vəziyyəti barədə məlumat hələ açıqlanmayıb.
Qaçırılan iki məktəbli qızın atası Əbdülkərim Abdullahi şagirdlərin əyalətin paytaxtı Birnin Kebbi şəhərinə aparıldığını bildirib.
"Onların azadlığa buraxıldığını eşidəndə çox sevindim. Son bir neçə gün mənim və ailəm üçün olduqca çətin keçdi. Onların sağlamlıqları ilə bağlı hökumətdən məlumat gözləyirəm, amma qızlarımı görmək üçün səbirsizlənirəm", - deyə o bildirib.
Daha əvvəl bildirilmişdi ki, noyabrın 21-də Niger əyalətindəki Müqəddəs Məryəm Katolik Məktəbinə edilən hücumda silahlı şəxslər 300-dən çox tələbə və işçi heyətini qaçırıblar. Lakin təxminən 50 tələbə qaçmağı bacarıb.
Rizvan CƏFƏROV,
"Azərbaycan"
