Ukrayna və Böyük Britaniya Müdafiə Nazirlikləri Britaniya ərazisində Ukraynanın "Octopus" adlı ələkeçirmə dronunun istehsalına dair lisenziya sazişi imzalayıb.
AFN.az xəbər verir ki, bunu Ukraynanın müdafiə naziri Denis Şmıqal bildirib. Onun sözlərinə görə, hazırlanan dronlar sonradan Kiyevə təhvil veriləcək.
Nazir bildirib ki, bu razılaşma Ukrayna istehsalı olan "Octopus" dronlarının Britaniyada kütləvi şəkildə buraxılmasına imkan yaradacaq. İstehsal həcmi ayda bir neçə min ədədə çata bilər.
Xatırladaq ki, Britaniya müdafiə nazirinin müavini Luke Pollard oktyabrın əvvəlində açıqlamışdı ki, tərəflər "Octopus" layihəsini yaxın aylarda işə salmaq üçün danışıqlar aparır. Onun sözlərinə görə, London və Kiyev aviasiya bombalarının istehsalı da daxil olmaqla digər birgə hərbi layihələr üzərində də çalışmaq niyyətindədir.
