BAKI, 28 noyabr. TELEQRAF
“Doğma kəndimizə nəvələrimlə qayıdıram, onlar bizdən də həyəcanlıdır”.
Teleqraf xəbər verir ki, bunu jurnalistlərə açıqlamasında Zəngilan rayonunun Məmmədbəyli kəndinə köç edən sakin Namaz Həmzəyev deyib.
O bildirib ki, illər sonra yurduna qayıtmaq hər kəsdə böyük sevinc və qürur hissi yaradıb:
“Hamımızın gözü aydın olsun. Bundan sonra elimizdə həmişə xoş günlər nəsib olsun”.
Namaz Həmzəyev 30 ilə yaxın həsrətdən sonra ailəsi ilə birlikdə dədə-baba yurduna qayıtdığını qeyd edib:
“Yurdumuzdan çıxanda 5 nəfər idik — mən, həyat yoldaşım və 3 övladım. İndi isə 8 nəfərlik ailəmlə geri dönürəm. Nəvələrimi doğma kəndimizə aparıram. Onlar bizdən də çox sevinirlər. Nəvələrim təhsillərini doğma yurdumuzda davam etdirəcəklər."
