"2018-ci ildən etibarən 4 milyon insanı əhatə edən 5 sosial islahat paketi həyata keçirilib. Bu islahatların illik əlavə maliyyə yükü 7.6 milyard manat təşkil edir".
Musavat.com xəbər verir ki, bunu əmək və əhalinin sosial müdafiəsi naziri Anar Əliyev
Bakıda ilk dəfə baş tutan Gələcəyin Peşələri Sammitində bildirib.
O əlavə edib ki, bu dövrdə əmək müqavilələrinin sayı 44% artaraq 1.9 milyona çatmış, sosial rifahın ən bariz göstəricilərindən biri olan əməkhaqqı fondu isə 3,2 dəfə artıb:
"Eyni zamanda minimum əməkhaqqı 3,1 dəfə artaraq 400 manata, orta aylıq əməkhaqqı isə 2 dəfə artaraq 1088 manata çatıb.
Bununla yanaşı, sosial ödənişlər sahəsində aparılan islahatların nəticəsi olaraq minimum pensiya 2,9 dəfə artaraq 320 manata, orta aylıq pensiya isə 2,6 dəfə artaraq 540 manata yüksəlib.
Əhaliyə ödənilən müavinət və Azərbaycan Respublikası Prezidentinin təqaüdləri üzrə ödənişlərin həcmi bu dövr ərzində 5 dəfə artıb.
Onu da qeyd edim ki, MDB ölkələri ilə müqayisədə alıcılıq qabiliyyəti pariteti üzrə ölkəmiz minimum pensiyada birinci, minimum əməkhaqqı və orta aylıq pensiya üzrə isə ikinci yerdə qərarlaşıb".
Afaq Mirayiq,
Musavat.com
