Bakı, 28 noyabr, Leyla Muradzadə, AZƏRTAC
Əlverişli strateji mövqeyə malik Azərbaycan Şərqlə Qərb arasında mühüm əlaqələndirici həlqədir. Hazırda ölkənin azad edilmiş ərazilərinin bərpasına, kənd təsərrüfatı və İKT kimi qeyri-neft sektorlarının, ticarət yollarının inkişafına yönəlmiş fəaliyyət istiqaməti “Sourcing Pak” şirkətinin beynəlxalq tədarük zəncirlərinin təminatı və texnologiyaların inteqrasiyası sahəsindəki təcrübəsinə tam uyğun gəlir. Bizim bu sahədə yanaşmamız isə artıq ənənəvi ticarətdən birgə müəssisələrin yaradılmasına doğru dəyişir.
Bunu AZƏRTAC-a müsahibəsində Pakistanın “Sourcing Pak Private Limited” şirkətinin idarəedici direktoru Rai Məhəmməd Usman deyib.
Onun sözlərinə görə, Azərbaycan azad edilmiş ərazilərdə kənd təsərrüfatının dirçəldilməsinə üstünlük verir ki, bu da öz növbəsində ənənəvi metodlardan “ağıllı” əkinçilik sistemlərinə keçidi tələb edir. İdarəedici direktor aqrotexnologiya və heyvandarlıq üzrə birgə mərkəzlərin yaradılması təklifi ilə çıxış edib.
““Sourcing Pak” şirkəti ABŞ, Avropa və Avstraliyanın aparıcı istehsalçılarından eqzotik südlük və ətlik iribuynuzlu heyvan cinslərinin, eləcə də kənd təsərrüfatı avadanlıqlarının tədarükü sahəsində təcrübəyə malikdir. “Sourcing Pak” Azərbaycan şirkətləri ilə əməkdaşlıqda, o cümlədən Qarabağda südlük və ətlik heyvandarlıq üzrə məsləhət, tədarük mərkəzi kimi fəaliyyət göstərəcək birgə müəssisənin yaradılmasında maraqlıdır. Bu mərkəz yüksək məhsuldar damazlıq iribuynuzlu heyvanlar, iqlimədavamlı kənd təsərrüfatı avadanlıqları və fermer təsərrüfatlarının idarə edilməsi üçün müasir proqram təminatı (AI/IT) təqdim edərək davamlı ərzaq istehsalını, ixrac qabiliyyətini təmin edəcək”, - deyə Rai Məhəmməd Usman əlavə edib.
Rai Məhəmməd Usman hesab edir ki, bütün bunlar ərzaq təhlükəsizliyinə bilavasitə töhfə verəcək, kənd yerlərində yüksək ixtisaslı iş yerləri yaradacaq və Azərbaycanın yüksək keyfiyyətli süd və ət məhsullarının regional ixracatçısı kimi mövqelərini möhkəmləndirəcək.
