Bakı, 28 noyabr, AZƏRTAC
Bakıda Türk Dövlətləri Təşkilatına (TDT) üzv ölkələrin QHT-lərinin həmrəylik forumunun keçirilməsi Türk dünyasının inteqrasiya prosesində yeni bir mərhələ kimi qiymətləndirilə bilər. Forum yalnız ictimai təşkilatların bir araya gəlməsi deyildi. TDT çərçivəsində son illər daha da dərinləşən siyasi, iqtisadi və humanitar əməkdaşlığın məntiqi davamı idi.
Bu sözləri AZƏRTAC-a açıqlamasında politoloq Züriyə Qarayeva söyləyib.
O bildirib ki, Azərbaycanın ev sahibliyi etdiyi tədbir Türk dövlətləri arasında həmrəyliyin artıq institusional çərçivədə möhkəmləndiyini göstərməklə yanaşı, gələcəkdə daha geniş kooperasiya platformalarının formalaşacağına dair aydın siqnallar verdi.
"TDT ölkələri son illərdə regional əməkdaşlığın həm təhlükəsizlik, həm diplomatiya, həm də sosial-humanitar xətt üzrə genişlənməsində mühüm addımlar atıblar. Xüsusilə Azərbaycan, Türkiyə, Qazaxıstan, Özbəkistan və Qırğızıstan arasında nəqliyyat-kommunikasiya əlaqələrinin güclənməsi, Orta Dəhlizin strateji əhəmiyyətinin artması, enerji infrastrukturunun genişləndirilməsi Türk dünyasını təkcə mədəni deyil, iqtisadi və geosiyasi güc mərkəzinə çevrilmək istiqamətində birləşdirir. Bu baxımdan QHT-lərin iştirakı ilə keçirilən forum cəmiyyətlərarası dialoqu artırmaqla dövlətlər səviyyəsində aparılan inteqrasiyanı dəstəkləyən sosial baza formalaşdırır.
Forumun fonunda TDT ölkələri arasında əməkdaşlığın perspektivləri daha aydın görünür. İlk növbədə, təşkilatın institusional güclənməsi, qərarların koordinasiyalı şəkildə qəbul edilməsi və vahid mövqe formalaşdırılması gündəmə gəlir. Humanitar sahədə ortaq təhsil layihələri, tələbə mübadiləsi, tarix və ədəbiyyatın birgə tədqiqi Türk kimliyinin möhkəmlənməsinə xidmət edir. Eyni zamanda, qeyri-hökumət təşkilatlarının regional çağırışlar: iqlim təhlükəsizliyi, informasiya təhdidləri, müasir münaqişə riskləri kimi məsələlərdə birgə təşəbbüslər irəli sürməsi TDT-nin yumşaq güc potensialını artırır", - deyə Z.Qarayeva vurğulayıb.
Politoloq əlavə edib ki, geosiyasi mühitin sürətlə dəyişdiyi dövrdə türk dövlətlərinin həmrəyliyi onların beynəlxalq arenada daha təsirli aktor kimi çıxış etməsinə imkan verir. Azərbaycan və Türkiyənin strateji tərəfdaşlığı, Mərkəzi Asiya ölkələrinin regional layihələrə aktiv qoşulması TDT-nin siyasi çəkisini artırır. Bu prosesdə vətəndaş cəmiyyəti institutlarının rolu daha çevik diplomatiya, ictimai diplomatiya və regional mədəni əməkdaşlıq üçün geniş imkanlar yaradır.
Nəticə etibarilə, Bakıda keçirilən QHT-lərin həmrəylik forumu TDT-nin inkişaf xəttində mühüm mərhələ olmaqla təşkilatın gələcək hədəflərinin daha geniş, daha strateji və daha inklüziv olacağına işarədir. Türk dövlətləri həm iqtisadi, həm siyasi, həm də humanitar sferada inteqrasiyanı dərinləşdirməklə regionda sabitlik, əlaqələndirilmiş siyasət və ortaq maraqlara əsaslanan yeni bir əməkdaşlıq modelinin formalaşmasına töhfə verməkdə davam edəcəklər.
