Sonzamanlar sosial şəbəkələrdə pultla idarə edilən plyonkaların satışı həyata keçirilir. Pultun düyməsi sıxılan anda avtomobilin içərisi görünmür.
Həmin plyonkarın satış qiyməti 1000 manatdan başlayır. Bu vasitəni həm ön, həm də arxa şüşülərə yerləşdirmək mümkündür. Məlumata görə, adıçəkilən vasitəyə hazırda xeyli tələbat var, alıcısı da az deyil.
Maraqlıdır, bu cür vasitələrin istifadəsi, xüsusilə də ön şüşəyə yerləşdirilməsi qanunidirmi?
Baş Dövlət Yol Polisi İdarəsi: “Plyonkalar müəyyən standartlara uyğun yerləşdirilməlidir, qaydalara əməl etməyənlər isə…”
Baş Dövlət Yol Polisi İdarəsindən "Bakı-Xəbər”ə bildirildi ki, plyonkalar müəyyən standartlara uyğun yerləşdirilməlidir. Onların ön şüşədə olması isə qadağandır: “Nazirlər Kabinetinin 18 nömrəli qərarına əsasən, nəqliyyat vasitələrinin yalnız sürücülərin arxa tərəfində yerləşən yan şüşələrinə, yük yerlərinin yan şüşələrinə plyonka və ya jaluzlər quraşdırıla bilər.Qaydaya əməl etməyən şəxsləri 150 manat məbləğində cərimə gözləyir”.
Aslan Əsədov: “Plyonkanın hansı formada olmasının önəmi yoxdur, əsas odur həmin vasitə düzgün və qanunun icazə verdiyi yerdə istifadə edilsin”
Nəqliyyat eksperti Aslan Əsədov “Bakı-Xəbər”ə şərhində bildirdi ki, rəngli plyonkaların və pərdələrin nəqliyyat vasitələrinə vurulmasına qanunla icazə verilir. Ancaq avtomobilin ön şüşəsinə hər hansı bir qapadıcı, plyonka, jalüz vurula bilməz: “Bunun səbəbi isə maşını idarə edən şəxsin kənardan görünməsi, avtomobilin içərisinin tam görünməsi ilə bağlıdır. Ön tərəfə plyonka çəkilirsə, burda şübhəli məqamlar ola bilər. Ancaq avtomobilin arxa şüşələrinə plyonka və ya jalüz vurula bilər. Dediyim kimi, plyonkanın hansı formada olmasının önəmi yoxdur, əsas odur həmin vasitə düzgün və qanunun icazə verdiyi yerdə istifadə edilsin. Hazırda pultla idarə olunan plyonkalar satışa çıxıb, bu da texnologiyanın inkişafı deməkdir”.
Günel CƏLİLOVA
