ABŞ Prezidenti Donald Tramp administrasiyası 19 ölkədən ABŞ-yə köç edərək “Green Card” alan şəxslərin sənədlərinə yenidən baxılacağını açıqlayıb. Metbuat.az xəbər verir ki, bu barədə ABŞ Vətəndaşlıq və İmmiqrasiya Xidmətlərinin direktoru Cozef Edlou açıqlama verib. O bildirib ki, Prezident Donald Trampın göstərişi ilə "riskli ölkə”lərdən olan hər bir əcnəbinin “Green Card” işləri hərtərəfli şəkildə nəzərdən keçiriləcək. Sözügedən ölkələrlə bağlı suala cavab olaraq Edlou Ağ Evin bundan əvvəl yayımladığı və Əfqanıstan, Kuba, Haiti, İran, Somali və Venesuelanı əhatə edən bəyanatına istinad edib. Qeyd edək ki, açıqlama Vaşinqtonda baş verən hücumdan sonra baş verib. Əfqanıstan vətəndaşı iki Milli Qvardiya əsgərinə atəş açaraq onları yaralayıb. Şübhəli Rəhmanullah Lakanvalın ABŞ-nin Əfqanıstandan çıxmasından sonra Xüsusi İmmiqrasiya Mühafizəsi Proqramı çərçivəsində 2021-ci ildə ölkəyə gəldiyi bildirilir.
