BAKI, 29 noyabr. TELEQRAF
Bakıda qadını amansızlıqla döyərək öldürməkdə təqsirləndirilən şəxsin cinayət işi üzrə məhkəmə araşdırması başa çatıb.
Teleqraf xəbər verir ki, 1970-ci il təvəllüdlü P. Stanislavın cinayət işi Bakı Ağır Cinayətlər Məhkəməsində araşdırılıb.
İttiham aktına əsasən, P. Stanislav birlikdə yaşadığı, 1968-ci il təvəllüdlü İrina adlı qadını uzun müddət fiziki və psixoloji zorakılığa məruz qoyaraq xüsusi amansızlıqla döyüb, nəticədə qadın aldığı ağır xəsarətlərdən ölüb.
İstintaqla müəyyən edilib ki, təqsirləndirilən şəxs zərərçəkmişin köməksiz vəziyyətindən istifadə edərək mütəmadi işgəncə verib, xuliqanlıq niyyəti ilə bədəninin müxtəlif nahiyələrinə çoxsaylı zərbələr endirib, onun səhhətinə qəsdən ağır zərər vurub və ölümə səbəb olub.
Zərərçəkmiş qadın qaraciyər sirrozundan əziyyət çəksə də, ekspertiza onun ölümünün P. Stanislav tərəfindən vurulan çoxsaylı xəsarətlərin nəticəsi olduğunu müəyyən edib. Ekspert rəyinə görə, İrina baş beynin əzilməsi və ödemi, çoxsaylı qansızmalar, geniş hematomalar, həmçinin bədənin müxtəlif nahiyələrində ciddi əzilmələr səbəbilə həyatını itirib.
Məhkəmədə ifadə verən P. Stanislav ittihamı qəbul etməyib, qadınla arasında yaxın münasibət olduğunu, ona köməklik etdiyini, ölümü isə guya zərərçəkmişin hamamda yıxılması ilə əlaqələndirib. O iddia edib ki, istintaq zamanı təzyiq altında etirafedici ifadə verib.
P.Stanislavın ifadəsindən məlum olub ki, o, 41 saylı mənzil kommunal istismar sahəsində fəhlə kimi çalışırmış. İrina ilə küçədə tanış olub. İrina spirtli içki aludəçisi olaraq küçədə tək yaşayırmış. Onlar tanış olduqdan sonra P.Stanislav onu evinə gətirərək birlikdə yaşamağa başlayıblar.
Lakin məhkəmə istintaqı zamanı təqsirləndirilən şəxsin ilkin ifadəsində İrinanın ondan spirtli içki tələb etdiyini, əsəbiləşərək qadını döydüyünü etiraf etməsi təsdiqlənib.
Məhkəmənin hökmü ilə P. Stanislav məhkəmənin hökmü ilə 10 il müddətinə azadlıqdan məhrum edilib.
