BAKI, 29 noyabr. TELEQRAF
Şəmkir rayonunda bıçaqlanma hadisəsi ilə bağlı cinayət işi üzrə məhkəmə prosesi başa çatıb.
Teleqraf.com xəbər verir ki, bıçaqlama hadisə şəhər ərazisində baş verib. Şəmkir sakini, 1986-cı il təvəllüdlü Zaman Hüseynov küçədə bıçaqlanaraq ağır xəsarətlər alıb və xəstəxanaya yerləşdirilərək əməliyyat olunub.
Polis əməkdaşlarının keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən 1986-cı il təvəllüdlü Azər Məsimov saxlanılıb.
İttiham aktına əsasən, Azər Məsimov qardaşı Bəxtiyar Məsimovun çayxanada Zaman Hüseynovla dalaşaraq döyülməsinə görə ondan cavab tələb etmək məqsədilə zərərçəkmişin evinə gedib. Söhbət zamanı Zaman Hüseynovun “yaxşı eləmişəm” ifadəsi işlətməsi və söyüş söyməsi Azəri qəzəbləndirib.
Bundan sonra onların arasında münaqişə yaranıb və A.Məsimov Z.Hüseynova bıçaqla iki dəfə zərbə vurub. Yaralı qonşular tərəfindən xəstəxanaya çatdırılıb. Hadisədən sonra Azər Məsimov polisə könüllü təslim olub.
Təqsirləndirilən şəxs ifadəsində törədiyi əməli etiraf edib, peşman olduğunu, zərərçəkmiş şəxslə barışdığını və dəymiş ziyanı ödədiyini bildirib.
Məhkəmədə ifadə verən zərərçəkmiş şəxs də barışdıqlarını, təqsirləndirilən şəxsə qarşı şikayət və tələbinin olmadığını deyib.
Məhkəmənin hökmü ilə Azər Məsimov Cinayət Məcəlləsinin 126.1-ci maddəsi (qəsdən sağlamlığa ağır zərər vurma) ilə təqsirli bilinib və 3 il müddətinə azadlıqdan məhrum etmə cəzası təyin olunub. Cinayət Məcəlləsinin 70-ci (Şərti) maddəsi tətbiq edilməklə hökmlə təyin edilmiş cəza şərti hesab edilib.
