BAKI, 29 noyabr. TELEQRAF
Fransanın milli aviadaşıyıcısı "Air France" "Airbus" konserninin istehsalı olan "A320" tipli təyyarələrdə aşkar olunan texniki problem səbəbindən 35 reysi ləğv edib.
Teleqraf xəbər verir ki, bu barədə "BFMTV" aviaşirkətin açıqlamasına istinadən xəbər yayıb.
Bildirilib ki, reysləri ləğv olunan sərnişinlər elektron poçt vasitəsilə birbaşa məlumatlandırılacaqlar.
Şirkətin açıqlamasına əsasən, 29 noyabr üçün ləğv ediləcək reyslərin dəqiq sayı daha sonra məlum olacaq.
Qeyd edək ki, bundan əvvəl "Airbus" uçuşların idarə olunması üçün kritik əhəmiyyət daşıyan məlumatlara günəş şüalanmasının zərərli təsiri ilə bağlı problem aşkar etdiyini bəyan edib.
İstehsalçı "A320" seriyalı təyyarələr üçün proqram təminatının təcili yenilənməsinə başlayıb.
Fransanın nəqliyyat naziri Filipp Tabaro bildirib ki, problem təxminən 6 min təyyarəni əhatə edir və nasazlıq aradan qaldırılana qədər onlar yaxın günlər və saatlar ərzində müvəqqəti istismardan çıxarılacaq. Nazir vurğulayıb ki, sərnişinlərin təhlükəsizliyi nəqliyyat sahəsində mütləq prioritetdir. Bu açıqlama Fransa hökumətinin rəsmi mövqeyi kimi qiymətləndirilir.
