Bakıda gənclərin informasiya-kommunikasiya texnologiyaları (İKT) sahəsinə cəlb olunması, rəqəmsal bacarıqlarının gücləndirilməsi və beynəlxalq təcrübəyə çıxış imkanlarının genişləndirilməsi istiqamətində ardıcıl tədbirlər görülür.
“İki sahil” xəbər verir ki, bu barədə İnnovasiya və Rəqəmsal İnkişaf Agentliyinin İdarə Heyətinin sədr müavini Rəşad Xalıqov “İKT Karyera Sərgisi”nin açılışında deyib.
Onun sözlərinə görə, ölkədə fəaliyyət göstərən şirkətlərin, gənclər təşkilatlarının və universitetlərin birgə iştirakı ilə müxtəlif təşəbbüslər icra edilir. Məqsəd İKT sahəsində peşəkar kadr potensialının formalaşdırılması və innovasiya mühitinin genişləndirilməsidir.
“2016-cı ildən etibarən qısa və uzunmüddətli təlim proqramları, startap layihələri, beynəlxalq müsabiqələrdə iştirak və aparıcı texnoloji şirkətlərdə təcrübə imkanları kimi çoxsaylı təşəbbüslər həyata keçirilib. Bu illər ərzində 200-dən çox gənc beynəlxalq şirkətlərdə təcrübə proqramlarına cəlb olunub, eləcə də müxtəlif innovativ layihələrdə uğurla təmsil olunub. Agentliyin həyata keçirdiyi layihələr gənclərin peşəkar inkişafına, rəqəmsal iqtisadiyyatın tələblərinə uyğun müasir bilik və bacarıqlar əldə etməsinə mühüm töhfə verir”, - deyə Rəşad Xalıqov qeyd edib.
R.Xalıqov vurğulayıb ki, bu proqramlar, həmçinin universitetlərlə əməkdaşlığın genişlənməsinə, təhsil və biznes sektoru arasında əlaqələrin möhkəmləndirilməsinə xidmət edir: “Yaradılan geniş platforma gənclərin öz bilik və bacarıqlarını nümayiş etdirməsi, həmçinin karyera inkişafı üçün real imkanlar qazanması baxımından çox əhəmiyyətlidir”.
