ain.az, 525.az portalına istinadən məlumatı açıqlayır.
Bakıda “Keyfiyyət, təhlükəsizlik və əlçatanlıq” mövzusunda 4-cü “Malayziyada Təhsil” sərgisi keçirilir.
525.az xəbər verir ki, sərgiyə qatılan Malayziyanın aparıcı universitetləri azərbaycanlı tələbələrə təhsil imkanlarını təqdim edib.
Sərgidə Malayziyanın Azərbaycandakı fövqəladə və səlahiyyətli səfiri Ahmad Kamrizamil Mohd Riza çıxış edərək ölkəsində təhsilin əsas xüsusiyyətləri və üstünlükləri barədə məlumat verib.
“Malayziyada Təhsil” sərgisini hər il təşkil etdiklərinə görə təşkilatçılar – “Lingva Language School Baku” və “Winning Magnitude of Malaysia” təşkilatlarına təşəkkürünü bildirib.
“2022-ci ildə ilk təhsil sərgisinin təşkilindən etibarən, səfirlik Azərbaycanın ərazisində Malayziyanın dünya səviyyəli təhsil imkanlarını tanıtmaq öhdəliyinə sadiq qalıb. Bu il artıq 4-cü dəfə keçirilən sərgi çərçivəsində Malayziyanın ən yaxşı ali təhsil müəssisələrini Azərbaycan tələbələrinə təqdim etməkdən qürur duyuruq. Malayziya təhsilə yalnız milli inkişafın mühərriki kimi deyil, eyni zamanda, beynəlxalq əməkdaşlığı təşviq edən və xalqlar arasında əlaqələri gücləndirən açıq və inklüziv bir mühit kimi yanaşır. Biz hər kəs üçün əlçatan olan, gələcəyə yönəlmiş və qlobal səviyyədə tanınan müxtəlif təhsil sistemi təklif etməkdən qürur duyuruq”, - diplomat deyib.
O əlavə edib ki, hazırda Malayziyada 150-dən çox ölkədən 133 mindən artıq beynəlxalq tələbə təhsil alır:
“Ali təhsil müəssisələrimiz informasiya texnologiyaları (İT), mühəndislik, biznes, tibb, İslam maliyyəsi və mehmanxana menecmenti kimi əsas sahələr üzrə geniş proqramlar təqdim edir. Bu proqramlar ciddi beynəlxalq akkreditasiya standartlarına cavab verən dövlət və özəl universitetlər tərəfindən təklif olunur. Təhsil əsasən ingilis dilində aparılır, təhsil haqları münasibdir və bütün bunlar təhlükəsiz, çoxmədəniyyətli bir mühitdə həyata keçirilir. Azərbaycanlı tələbələr arasında, xüsusilə kompüter elmləri, İT, biznes və yeni texnologiyalar da daxil olmaqla rəqəmsal iqtisadiyyata uyğun ixtisaslara marağın artması bizi sevindirir.
Eyni zamanda, Azərbaycan universitetləri, təhsil müəssisələri və agentlikləri ilə birgə elmi-tədqiqat layihələri və tələbə mübadiləsi proqramları kimi akademik tərəfdaşlıqların genişləndirilməsini səbirsizliklə gözləyirik. Bu əməkdaşlıqlar artıq müsbət nəticələr verib və gələcək inkişaf üçün böyük potensial vəd edir”.
Səfir bildirib ki, xaricdə təhsil prosesini anlamaq bəzən mürəkkəb ola bilər. Bu səbəbdən, Malayziya azərbaycanlı tələbələr üçün xüsusi dəstək xidmətləri, aydın müraciət mexanizmləri və məsləhət proqramları təqdim edir ki, onların Malayziyaya uyğunlaşması və uğurlu təhsil alması təmin edilsin:
“Hər kəsi Malayziyanı yalnız keyfiyyətli təhsil məkanı kimi deyil, eyni zamanda, qlobal imkanlara açılan bir qapı kimi görməyə çağırıram. Biz sizi səmimi qəlbdən qarşılamağa, akademik məqsədlərinizi dəstəkləməyə və gələcək uğurlarınıza töhfə verməyə hazırıq”.
Sərgidə Universiti Putra Malaysia (UPM), Sunway University, SEGi University, Taylor’s University, Management and Science University (MSU), Quest International University və Universiti Teknologi Malaysia (UTM) iştirak edirlər. Universitet nümayəndələri təhsil proqramları, qəbul tələbləri və tam təqaüd imkanları da daxil olmaqla ətraflı məlumat təqdim ediblər.
Malayziya yüksək keyfiyyətli təhsil, güclü beynəlxalq reytinqlər, təhlükəsiz və qonaqpərvər mühit, münasib yaşayış xərcləri və Azərbaycan vətəndaşları üçün viza rejiminin olmaması ilə seçilərək, ali təhsil üçün çox cəlbedici ölkə hesab olunur.
Tədbirdə bildirilib ki, hazırda Malayziyada 50-dən çox azərbaycanlı tələbə təhsil alır və bu, Malayziya ali təhsilinə artan marağı nümayiş etdirir. Eyni zamanda, son illər bütün dünyada Malayziyada təhsilə maraq artıb.
Malayziya tibb, kompüter elmləri, mühəndislik, hüquq, biznes, kibertəhlükəsizlik və süni intellekt, psixologiya, memarlıq daxil olmaqla, 100-lərlə istiqamət üçün bakalavr, magistr və doktorluqtəhsili almaq olar. Malayziya universitetləri yüksək reytinqlə yanaşı, praktiki dərs proqramları, müasir laboratoriyaları və kampusları və çağdaş əmək bazarının tələblərinə operativ uyğunlaşmaları ilə fərqlənirlər. Bu səbəbdən universitetlərin işə düzəlmə əmsalı 90 faiz üzərindədir.
Sərgi akademik əməkdaşlığın gücləndirilməsinə və azərbaycanlı tələbələr üçün beynəlxalq səviyyədə tanınan təhsil imkanlarının genişləndirilməsinə xidmət edir.
Pərvanə Sultanova
Hadisənin gedişatını izləmək üçün ain.az saytında ən son yeniliklərə baxın.
