“Keyfiyyət, təhlükəsizlik və əlçatanlıq” adlı imkanlar
QHT.az xəbər verir ki, bu gün Bakıda Malayziya Təhsil Sərgisi keçirildi. Tədbir Malayziyanın aparıcı universitetlərini bir araya gətirərək azərbaycanlı tələbələrə təhsil imkanlarını təqdim etdi. Sərgidə Malayziyanın Azərbaycandakı fövqəladə və səlahiyyətli səfiri Ahmad Kamrizamil Mohd Riza iştirak edərək Malayziyada təhsilin əsas xüsusiyyətləri və üstünlükləri barədə çıxış etdi. O, Malayziyanın 250,000 xarici tələbə qəbul etməyi və beynəlxalq təhsil mərkəzinə çevrilməyi hədəflədiyini vurğuladı.
Sərgi Azərbaycan və Malayziya arasında təhsil sahəsində sürətlə inkişaf edən ikitərəfli münasibətləri əks etdirdi. Oktyabr ayında Azərbaycanın Elm və Təhsil naziri bildirib ki, hazırda Malayziyada 50-dən çox azərbaycanlı tələbə təhsil alır və bu, Malayziya ali təhsilinə artan marağı nümayiş etdirir.
Tədbirdə Universiti Putra Malaysia (UPM), Sunway University, SEGi University, Taylor’s University, Management and Science University (MSU), Quest International University və Universiti Teknologi Malaysia (UTM) iştirak etmişdir. Universitet nümayəndələri təhsil proqramları, qəbul tələbləri və tam təqaüd imkanları da daxil olmaqla ətraflı məlumat verdilər.
Malayziya yüksək keyfiyyətli təhsil, güclü beynəlxalq reytinqlər, təhlükəsiz və qonaqpərvər mühit, münasib yaşayış xərcləri və Azərbaycan vətəndaşları üçün viza rejiminin olmaması ilə seçilərək, ali təhsil üçün çox cəlbedici ölkə hesab olunur.
Malayziya tibb, kompyuter elmləri, mühəndislik, hüquq, biznes, kibertəhlükəsizlik və süni intellekt, psixologiya, memarlıq daxil olmaqla, 100-lərlə istiqamət üçün bakalavr, magistr və doktorluq təhsili almaq olar. Malayziya universitetləri yüksək reytinqlə yanaşı, praktiki dərs proqramları, müasir laboratoriyaları və kampusları və çağdaş əmək bazarının tələblərinə operativ uyğunlaşmaları ilə fərqlənirlər. Bu səbəbdən universitetlərin işədüzəlmə əmsalı 90% üzərindədir.
Sərgi akademik əməkdaşlığın gücləndirilməsinə və azərbaycanlı tələbələr üçün beynəlxalq səviyyədə tanınan təhsil imkanlarının genişləndirilməsinə xidmət edir.
