Azərbaycan Premyer Liqasının XIII turunda ölkə çempionu “Qarabağ” bu gün “Karvan-Yevlax”la qarşılaşacaq.
Msport.az xəbər verir ki, hazırda 26 xalla turnir cədvəlinə başçılıq edən Ağdam təmsilçisi qələbə qazanaraq yerini möhkəmləndirməyə çalışacaq.
5 xalla sonuncu – 12-ci yerdə qərarlaşan “Karvan-Yevlax” isə sürpriz nəticəyə ümid edir. Sözügedən qarşılaşma “Azərsun Arena”da, saat 17:00-da başlayacaq.
Günün növbəti matçı isə debütant “İmişli” və “Sabah” arasında reallaşacaq.
İlk dövrədə tərəflər arasında keçirilən qarşılaşmada səfərdə qələbə qazanan bölgə təmsilçisi eyni uğuru Quba Olimpiya İdman Kompleksinin stadionunda da təkrarlamaq niyyətindədir. Bu matç saat 14:30-da start götürəcək. “Bayquşlar” 24 xalla turnir cədvəlinin dördüncü, “İmişli” isə 15 xalla səkkizinci pilləsində yer alıb.
Premyer Liqa
XIII tur
29 noyabr
14:30. “İmişli” – “Sabah”
Hakimlər: Elçin Məsiyev, Elşad Abdullayev, Pərvin Talıbov, Elvin Bayramov
VAR: Rauf Cabarov
AVAR: Zeynal Zeynalov
Hakim-inspektor: Anar Salmanov
AFFA nümayəndəsi: Elgiz Abbasov
Quba Olimpiya İdman Kompleksinin stadionu
17:00. “Qarabağ” – “Karvan-Yevlax”
Hakimlər: Kamranbəy Rəhimov, Eyyub İbrahimov, Zöhrab Abbasov, Kamran Əliyev
VAR: Cavid Cəlilov
AVAR: Kamran Bayramov
Hakim-inspektor: Ömər Paşayev
AFFA nümayəndəsi: Nəriman Axundov
“Azərsun Arena”
Qeyd edək ki, turun əvvəlki görüşlərində “Zirə” “Kəpəz”i 2:0 hesabı ilə məğlub edib. “Turan-Tovuz” – “Neftçi” görüşündə isə hesab açılmayıb. Tura noyabrın 30-da yekun vurulacaq.
