Bakıda keçirilən “Malayziyada Təhsil” sərgisi çərçivəsində Malayziyanın Azərbaycandakı fövqəladə və səlahiyyətli səfiri Ahmad Kamrizamil Mohd Riza tədbir iştirakçılarına müraciət edərək iki ölkə arasında təhsil sahəsində əməkdaşlığın ardıcıl şəkildə inkişaf etdiyini vurğulayıb.
QHT.az xəbər verir ki, Səfir çıxışında bildirib ki, Malayziya ilə Azərbaycan arasında təhsil tərəfdaşlığı son illər ərzində daha da möhkəmlənib:
"Bu gün hamınızla birlikdə olmaq və xüsusilə təhsil sahəsində artmaqda olan tərəfdaşlığı qeyd etmək mənim üçün böyük şərəfdir. Bu münasibətlər illər ərzində ardıcıl şəkildə inkişaf etmiş və möhkəmlənmişdir. Mən, həmçinin, bu “Malayziyada Təhsil” sərgisini hər il təşkil etdiklərinə görə təşkilatçılar – Lingva Language School Baku və Winning Magnitude of Malaysia təşkilatlarına dərin təşəkkürümü bildirmək istəyirəm. 2022-ci ildə ilk təhsil sərgisinin təşkilindən etibarən, Səfirlik Azərbaycanın ərazisində Malayziyanın dünya səviyyəli təhsil imkanlarını tanıtmaq öhdəliyinə sadiq qalmışdır. Bu il artıq 4-cü dəfə keçirilən sərgi çərçivəsində Malayziyanın ən yaxşı ali təhsil müəssisələrini Azərbaycan tələbələrinə təqdim etməkdən qürur duyuruq".
Diplomat, tədbirin artıq ənənəyə çevrildiyini qeyd edərək sərginin təşkilatçıları – Lingva Language School Baku və Winning Magnitude of Malaysia təşkilatlarına təşəkkür edib. O xatırladıb ki, 2022-ci ildən təşkil olunan təhsil sərgisi çərçivəsində Malayziyanın dünya səviyyəli ali təhsil imkanları Azərbaycan gənclərinə ardıcıl şəkildə təqdim olunur:
"Malayziya təhsilə həm milli inkişafın, həm də beynəlxalq əməkdaşlığın mühüm dayağı kimi yanaşır. Hazırda ölkədə 150-dən çox ölkədən 133 mindən artıq beynəlxalq tələbə təhsil alır. Malayziya universitetləri İT, mühəndislik, biznes, tibb, İslam maliyyəsi və mehmanxana menecmenti kimi sahələr üzrə geniş tədris proqramları təklif edir. Təhsil əsasən ingilis dilində aparılır, təhsil haqları münasibdir və tələbələr üçün təhlükəsiz, çoxmədəniyyətli mühit mövcuddur. Azərbaycanlı tələbələr arasında xüsusilə rəqəmsal iqtisadiyyat, kompüter elmləri və yeni texnologiyalar üzrə proqramlara maraq artmaqdadır".
Ahmad Kamrizamil Mohd Riza bildirib ki, Malayziya universitetləri ilə Azərbaycan təhsil müəssisələri arasında tələbə mübadiləsi, birgə tədqiqatlar və akademik layihələr üzrə əməkdaşlıq artıq öz müsbət nəticələrini verməkdədir:
"Bu əməkdaşlığın gələcəkdə daha da genişlənəcəyi gözlənilir. Sərgidə Malayziyanın aparıcı universitetləri təmsil olunub
Tədbirdə aşağıdakı nüfuzlu ali təhsil müəssisələri nümayiş olunub:
-
Universiti Putra Malaysia (UPM)
-
Taylor’s University
-
SEGi University
-
Sunway University
Bu universitetlər innovativ tədris metodları, elmi tədqiqata sadiqlikləri, müasir laboratoriyaları və sənaye standartlarına uyğun tədris imkanları ilə seçilirlər".
Diplomat çıxışının sonunda Azərbaycan gənclərini Malayziyada ali təhsili karyera imkanlarını genişləndirən perspektivli bir seçim kimi nəzərdən keçirməyə dəvət edib:
“Malayziyaya gələn bütün tələbələri səmimi qəlbdən qarşılamağa, onların akademik məqsədlərinə dəstək olmağa və uğurlarına töhfə verməyə hazırıq. Terima kasih və çox sağ olun.”
Pərvanə Fərhadqızı
