Azərbaycan tarixi fənni bütün ixtisas qruplarına əlavə edilməlidir.
Bu fikirləri AzEdu.az-ın "TəhsilSİZ" verilişində təhsil tədqiqatçısı Elmin Nuri səsləndirib.
Elmin Nuri bildirib ki, hər bir fənnin proqramı ilə yanaşı, onun məzmum xətti və kurikulumu xüsusi önəm daşıyır:
"Hazırda hər bir fənnin proqramı ilə yanaşı, onun məzmum xətti və kurikulumu də böyük önəm daşıyır. Azərbaycan tarixi fənninin kurikulumu isə xüsusilə vacib məsələləri əks etdirir. Burada məqsəd yalnız konkret faktları, məsələn, döyüşlərin keçirildiyi illəri və sülh müqavilələrinin tarixini əzbərlətmək deyil. Bunlar faktoloji məlumatlardır.
Hər bir fənnin məzmun standartları mövcuddur və bu standartlar tələbələrin təhsildən sonrakı inkişafına və üstünlük mexanizminə birbaşa təsir göstərir".
Azərbaycan tarixinin məzmun standartları milli şüur və milli hisslərin formalaşması baxımından da vacibdir:
“Buna görə də hesab edirəm ki, tarix fənni I və IV ixtisas qruplarına da əlavə edilməlidir. Əlbəttə, bu fikir hər kəs tərəfindən bəyənilməyə bilər, çünki abituriyentlərin dərs yükü onsuz da ağırdır və qəbul imtahanlarına yeni fənnin əlavə olunması onlara əlavə narahatlıq yarada bilər.
Amma təhsil siyasətində yalnız indiki mərhələni düşünmək kifayət deyil. Biz həm də gələcəyi nəzərə almalıyıq və milli biliklərin davamlılığını təmin etməyə prioritet hesab etməliyik”, - deyə Elmin Nuri vurğulayıb.
