Gəncə Regional Turizm İdarəsinin (RTİ) təşəbbüsü ilə turizm dəyər zəncirinə daxil olan dövlət və özəl qurumların iştirakı ilə geniş tərkibli şəbəkələşmə görüşü keçirilib. Tədbirin əsas məqsədi turizmin dəyər zəncirinin hər üç fazası və 10 əsas həlqəsi üzrə müəyyənləşdirilmiş qurumlar arasında qarşılıqlı əlaqələrin gücləndirilməsi, davamlı əməkdaşlıq platformasının formalaşdırılması və regionda turizm sahəsinin inkişafına təkan vermək olub.
Görüş çərçivəsində mövcud vəziyyət və gələcək əməkdaşlıq istiqamətlərini əhatə edən üç panel müzakirəsi aparılıb:
“Turizm dəyər zənciri üzrə dövlət və özəl qurumlar arasında əməkdaşlıq imkanlarının mövcud vəziyyəti” ilə bağlı müzakirədə tərəflər dəyər zəncirinin müxtəlif mərhələlərində birgə fəaliyyət imkanlarını, mövcud çağırışları və onların həlli yollarını dəyərləndirib.
“Turizm məkanlarının təbliği və təşviqində dövlət və özəl müəssisələrin rolu” panelinin iştirakçıları regionun turizm potensialının daha geniş auditoriyaya çatdırılması, səmərəli marketinq strategiyaları və təşviqat mexanizmləri barədə fikir mübadiləsi aparıblar.
“Turizm ixtisası olan təhsil müəssisələrinin şəbəkələşməsinin qərb regionunda turizmin inkişafında əhəmiyyəti”. Burada isə təhsil müəssisələri ilə turizm sənayesi arasında əməkdaşlıq, kadr hazırlığının keyfiyyətinin artırılması və gənclərin turizm sektoruna cəlb olunması məsələləri müzakirə edilib.
Tədbir çərçivəsində həmçinin turizm dəyər zəncirinin mahiyyəti, onun turizm məkanlarının planlaşdırılması və davamlı idarə olunmasındakı rolu barədə maarifləndirici təqdimat keçirilib.
Gəncə RTİ nümayəndələri tərəfindən idarənin cari ildə həyata keçirdiyi layihələr, görülmüş işlər və əldə olunan nəticələr haqqında iştirakçılara ətraflı hesabat təqdim olunub.
Görüş regionda turizm sektorunun inkişafında mühüm addım kimi qiymətləndirilir və tərəfdaş qurumlar arasında uzunmüddətli əməkdaşlığın möhkəmləndirilməsinə töhfə verməsi gözlənilir.
Hamlet Qasımov,
XQ-nin bölgə müxbiri
