ain.az, Konkret.az saytından verilən məlumata əsaslanaraq xəbər yayır.
AXCP sədri Əli Kərimli saxlanılıb və evində axtarış aparılıb. Partiya sədrinin evində aparılan axtarış Prezident Administrasiyasının sabiq rəhbəri Ramiz Mehdiyevin Dövlət Təhlükəsizliyi Xidmətində istintaq olunan cinayət işi ilə əlaqədardır. Belə ki, Əli Kərimlinin adı dövlətə xəyanət ittihamı ilə həbs edilən PA-nın sabiq rəhbəri Ramiz Mehdiyevlə işbirliyində hallanır.
Bəs Əli Kərimlinin saxlanılması hansı qaranlıq məqamları üzə çıxara bilər?
Mövzu ilə bağlı Müasir Müsavat Partiyasının sədri Hafiz Hacıyev KONKRET.az-a açıqlama verib və bəzi mətləblərə aydınlıq gətirib. Partiya sədr Əli Kərimlinin çoxdan saxlanılmalı olduğunu diqqətə çatdırıb:
Hafiz Hacıyev
“Əli Kərimli Ramiz Mehdiyevlə birləşərək dövləti zorla ələ keçirmək üçün ciddi planlar cızıb. Bu planın tərkib hissəsi kimi həm hakimiyyət daxilindən, həm də müxalifətdən insanların küçələrə çıxarılması məsələsi yer alıb. Ramiz Mehdiyev öz bağında Əli Kərimli ilə görüşlər də keçirib. Bütün bunları biz deyərkən, bəzi adamlar məsələyə qeyri-ciddi yanaşırdılar. Ramiz Mehdiyev hələ 2010-cu ildən Əli Kərimli ilə yaxın münasibətlər qurub. Hətta o vaxt Mehdiyevin yanında olan adamlardan biri mənə, “Əli Kərimlidən nə istəyirsən?” sualını da ünvanlamışdı. Ancaq Əbülfəz Elçibəyi zəhərləyən bir şəxsi mən bağışlaya bilmədiyim üçün hər zaman ona qarşı sərt mövqe sərgiləmişəm. Ancaq o vaxt məhz Ramiz Mehdiyev Əli Kərimlini həbs etməyə imkan vermədi”.
Hafiz Hacıyev əlavə edib ki, Əli Kərimli həbs olunacaq. Onun Ramiz Mehdiyevlə və xaricdəki Azərbaycan əleyhinə çıxan şəxslərlə əlaqələri açılacaq:
“Əli Kərimli ilə Mehdiyevin yazışmaları, ondan aldığı pullar, xaricə göndərilən danoslar və digər sənədlər üzə çıxacaq. Üstəlik, hakimiyyətin Ramiz Mehdiyevə bağlı olan müəyyən qollarından Əli Kərimliyə hər ay 70-80 min dollar pul ötürülməsi aşkar ediləcək. Əli Kərimli personası hər ötən gün cəmiyyətə üfunət qoxurdu. Ona görə də, Kərmlinin hansısa formada məsuliyyətə cəlb edilməsi vacib idi. Düşünürəm ki, onun saxlanılması gecikmiş olsa da, çox böyük addımdır”.
Müşviq Tofiqoğlu
KONKRET.az
Hadisənin gedişatını izləmək üçün ain.az saytında ən son yeniliklərə baxın.
