Ədalət Partiyasının qərargahında gənc istedadların şeir, rəsm və musiqi nümunələrindən ibarət “Ədalətin Gənc İnciləri” adlı yaradıcılıq tədbiri keçirilib. Tədbirdə istedadlı gənclərin valideynləri, ziyalılar və media nümayəndələri iştirak ediblər.
İştirakçılar əvvəlcə gənc rəssam İlahə Əliyevanın vətənpərvərlik və təbiət mövzularında işlənmiş əsərləri ilə tanış olublar. İ.Əliyevanın əl işləri iştirakçılar tərəfindən xüsusi maraqla qarşılanıb.
Tədbir Azərbaycan Respublikasının Dövlət Himninin səsləndirilməsi ilə rəsmi şəkildə açıq elan edilib. Açılış nitqi ilə çıxış edən Ədalət Partiyasının sədri Mütəllim Rəhimli gənclərin yaradıcılıq potensialının üzə çıxarılması üçün onların inkişafına dəstək verilməsinin vacibliyini vurğulayıb. O, belə tədbirlərin ölkənin gələcək inkişafında mühüm rol oynadığını qeyd edərək, iştirakçılara uğurlar arzulayıb. Partiya sədri Azərbaycanın ən qiymətli sərvətinin insanlar, xüsusilə istedadlı şəxslər olduğunu qeyd edib.
Sonra M.Rəhimli tədbirin aparıcısı Vəfa Əliyevanı proqramı davam etdirmək üçün səhnəyə dəvət edib.
Tədbir çərçivəsində məktəblilər şeir kompozisiyaları, musiqi ifaları və rəqs nömrələri ilə çıxış ediblər. Uşaqların təqdim etdiyi yaradıcılıq nümunələri iştirakçılar tərəfindən alqışla qarşılanıb.
Mərasimin fəxri qonaqları – şair Rəfail Həbiboğlu, Ədalət Partiyasının sədr müavinləri Elman Bağırov, Eldəniz Xəlilov, Fizuli Kərimov və digər natiqlər yeniyetmələrin istedadını yüksək qiymətləndirərək onlara gələcək fəaliyyətlərində uğurlar arzulayıblar.
Tədbirin sonunda gənc incilərin valideynləri Partiya rəhbərliyinə və təşkilatçılara göstərilən diqqət və qayğıya görə minnətdarlıqlarını bildiriblər.
Tedbir gənc iştirakçılara Ədalət Partiyası tərəfindən təşəkkürnamələrin təqdim edilməsi və xatirə şəkillərinin çəkilməsi ilə başa çatıb.
