ain.az, Cebheinfo portalından verilən məlumatlara əsaslanaraq xəbər verir.
Xəbər verdiyimiz kimi, bu gün Azərbaycan Xalq Cəbhəsi Partiyasının (AXCP) sədri Əli Kərimlinin evində axtarış aparılıb.
Bu, DTX-da aparılan araşdırma çərçivəsində həyata keçirilib.Qeyd edək ki, Əli Kərimlinin evində axtarış aparılması Ramiz Mehdiyevin DTX-də istintaq olunan cinayət işi ilə əlaqədardır.
Məsələ ilə bağlı Milli Cəbhə Partiyasının (MCP) sədri, Milli Məclisin deputatı Razi Nurullayev “Cebheinfo.az”-ın suallarını cavablayıb.
- Ramiz Mehdiyev getdi, AXCP sakitləşdi. Bu təsadüfdürmü?
Xeyr, təsadüf deyil. Mən bunu bir cümlə ilə deyim: AXCP-nin meydandakı tonunu uzun illər təkcə partiya rəhbərliyi müəyyən etmirdi. Mehdiyevin siyasi orbitdən çıxması ilə həmin “gizli generator” da sönmüş oldu və bu, çox dəqiq şəkildə mitinqlərə də ciddi təsir etmiş oldu.
- Milli Şura Rusiyanın layihəsi idi və Mehdiyev də içində ola bilərdi. Siz necə düşünürsüz?
Bunu aydınlaşdırmaq üçün həmin dövr gördüklərimiz və bildiklərimiz kifayət edir.
Bu mövzu haqqında danışanda çox adam ehtiyat edir, amma mən ehtiyat etmirəm. Milli Şura yarananda mən orda baş verənləri yaxından görürdüm. Açıq deyim: atmosfer nə Bakıdan gəlirdi, nə də Qərb institutlarından. Orada Moskvaya yaxın fiqurların tonunu hiss etmək olurdu.
Ramiz Mehdiyev isə sovet siyasi məktəbinin ən köhnə simalarından biridir. Onun bu proseslərdən tam kənarda qalması məntiqə uyğun gəlmir. O, Azərbaycan siyasətində görünən fiqur deyildi, amma təsir imkanları həmişə geniş olub.
Milli Şuranın sərt ant-ihakimiyyət ritorikasının Rusiyanın maraqları ilə üst-üstə düşməsi də təsadüfi deyildi. Mən bunu açıq demişəm: həmin konstruktorun içində Mehdiyevin dolayı rolu çox real görünürdü. O, bunu gizlətməyi yaxşı bacaran adamlardandır.
- AXCP Mehdiyev üçün hakimiyyətə təzyiq aləti olubmu?
Çox güman ki, olub. Mən bunu artıq mübahisə mövzusu hesab etmirəm. AXCP-nin bəzi dövrlərdə göstərdiyi əsəbilik, həddindən artıq sərtlik, siyasi emosiyanın qəfil yüksəlişi - bunların heç biri partiyanın real gücü ilə uyğun gəlmirdi. Bu davranış daha çox daxili hakimiyyət savaşlarının təsirini xatırladırdı.
Bəlkə AXCP-nin sıravi adamları bunu tam anlamırdı, amma bəzi qrupların bu partiyanı öz daxili rəqabətlərində “səs gücləndirici” kimi istifadə etməsi real idi.
- Mehdiyev Əli Kərimliyə pul veribmi?
Bu iddia ilə bağlı konkret fakt görməmişəm, iştirakçı olmamışam, amma bu ehtimalı bir hərf belə azaltmadan deyim: mümkündür. Çünki siyasətdə “pul vermək” fiziki pul demək deyil.
Amma, fiziki olaraq da pul verilib. Əks halda, nə siyasətçi özü fəaliyyət göstərə, nə də partiyanı saxlaya bilər. Bununla bərabər, siyasi dəstək, əlaqə kanalı, toxunulmazlıq — bunların hər biri puldan daha dəyərli dəstəkdir.
Əgər kimsə kimisə təzyiq və balans aləti kimi istifadə edirsə, ona hansısa formada enerji ötürməlidir. Bu enerjinin də formaları çoxdur. Mən partiyada olduğum dövrdə çox qəribə proseslər görmüşəm. Bəzi addımlar nə siyasi məntiqlə, nə partiya strategiyası ilə üst-üstə düşürdü. Ona görə də bu iddianı qəti inkar edənlərin mövqeyi mənə real görünmür.
- Bu münasibətlərdən hansı dərs çıxarılmalıdır?
Dərs çox sadədir, amma ağırdır: müxalifət kimin üçün savaşırsa, ona xidmət edir. Əgər bir gün müxalifət özünü xalq üçün savaşan qüvvə kimi göstərib, ertəsi gün hansısa köhnə qvardiya fiqurunun siyasi planlarına enerji verirsə, bu artıq mübarizə deyil, rol bölgüsüdür.
Mən AXCP-dən ayrılmağımın səbəblərindən birini də burada görürdüm: qərarların bir qismi partiyada verilmirdi. Kənar siyasi atmosfer partiyanın iç qüvvəsindən daha güclü idi. Bu isə müxalifəti müstəqil qüvvə olmaqdan məhrum edirdi.
Bugünkü siyasət üçün dərs budur: kiminlə olursansa, onun oyununa düşəcəksən. Ona görə də müxalifət öz iradəsini tam bərpa etməlidir, yoxsa yenə başqalarının planının bir hissəsinə çevriləcək.
- Siz AXCP-dən ayrılıb Milli Cəbhə Partiyasını qurdunuz. Bu mövzuda şəxsi nəticəniz nə oldu?
- AXCP-də qalmaq mənim üçün artıq mənalı deyildi, çünki proses partiyanın içindən idarə olunmurdu. Şəffaf qərar mexanizmi yox idi. Mən siyasətdə kimin kimə hansı mesajı daşıdığını hiss edirdim. Ona görə çıxıb öz yolumu qurmaq daha düzgün idi. Politikada ən ağır xəstəlik — öz iradəsini itirməkdir. Mən o xəstəliyə yoluxmaq istəmirdim.
Söhbətləşdi: Gülər
“Cebheinfo.az”
Açar sözlər:
Əli Kərimli Ramiz Mehdiyev Razi Nurullayev
Problemlərinizi bizə yazın, şahidi olduğunuz hadisələri çəkib göndərin
Daha ətraflı məlumat və yeniliklər üçün ain.az saytını izləyin.
