"Dövlət Təhlükəsizliyi Xidməti (DTX) Əli Kərimlinin evində axtarış aparıb və bu, Ramiz Mehdiyevin həbsi ilə bağlı məsələlərlə əlaqəlidir.
Hazırda həm ölkə daxilində, həm də xaricdə özünü müxalifət adlandıran qüvvələr hay-küy salıblar. Əslində, əgər bir şəxs özünü müxalifət lideri kimi təqdim edir və onun adı ölkənin ən yüksək vəzifəli şəxslərindən biri olmuş - Prezident Administrasiyasının sabiq rəhbəri ilə yanaşı çəkilirsə, o şəxs çoxdan hüquqi araşdırmalara cəlb olunmalı idi".
Bunu Oxu.Az-a açıqlamasında sabiq deputat, siyasi elmlər doktoru Cümşüd Nuriyev deyib.
O bildirib ki, DTX müvafiq araşdırma apardıqdan sonra Əli Kərimlinin evində axtarış həyata keçirilib:
"Azərbaycan Respublikasının qanunvericiliyinə əsasən, "Əməliyyat-axtarış fəaliyyəti haqqında" qanuna uyğun olaraq, istənilən Azərbaycan vətəndaşı haqqında hər hansı bir məlumat varsa, prokurorluğun sanksiyası və ya məhkəmə qərarı əsasında axtarış aparıla bilər. Təbii ki, burada DTX-nın apardığı axtarış tamamilə qanun çərçivəsində həyata keçirilib. DTX çox ciddi, məsuliyyətli dövlət orqanıdır və əsassız şəkildə heç bir addım atmır".
"Unutmaq olmaz ki, Əli Kərimli 10 il parlamentdə deputat kimi fəaliyyət göstərib və bu müddət ərzində dəfələrlə özünü xalqın sözçüsü kimi aparıb, amma onunla bağlı mətbuatda və ictimaiyyət arasında, həm də AXCP daxilində müxtəlif informasiyalar yer alıb. Yəni onun əməlində cinayət tərkibi olması təbii ki, istintaqla müəyyənləşəcək, amma əgər Ramiz Mehdiyevlə bağlı materiallar səbəbindən onun evində axtarış aparılıbsa, bu, artıq Azərbaycan müxalifətinin hakimiyyətə qeyri-qanuni yolla gəlmək istəyinin bariz nümunəsi olacaq. Çünki bu, dövlət çevrilişinə cəhddir. Bu, həm də göstərir ki, müxalifət daxilində, eləcə də iqtidar daxilində olan satqın qüvvələr birləşərək Azərbaycan dövlətinə qarşı xəyanətlə məşğuldurlar. Ən təhlükəli məqam odur ki, Qarabağı işğaldan azad edərək ölkəmizin ərazisindəki separatizmə son qoyan, azı 100 illik problemə birdəfəlik son qoyan dövlət başçısına qarşı belə bir xəyanət cəhdi edilib", - deyə müsahibimiz əlavə edib.
O diqqətə çatdırıb ki, bu hadisələr göstərir ki, Azərbaycanda həm iqtidar, həm də müxalifət daxilində təmizlənmə prosesi başlanılıb:
"Cənab Prezidentin rəhbərliyi ilə ölkədə sağlam siyasi mühitin qurulması üçün addımlar atılır. Azərbaycanda demokratik prinsiplərə əsaslanan, qanunvericiliyə uyğun fəaliyyət göstərən istənilən siyasi partiyanın fəaliyyətinə heç bir maneə yoxdur".
