BAKI, 29 noyabr. TELEQRAF
Ukrayna Türkiyə sahillərində tankerlərə edilən hücumları SBU və Hərbi Dəniz Qüvvələrinin əməliyyatı çərçivəsində həyata keçirilib.
Teleqraf "Strana.ua"ya istinadən xəbər verir ki, Türkiyə sahillərində Qara dənizdə tankerlər Ukraynanın “Sea Baby” hərbi dəniz pilotsuz təyyarələri tərəfindən hücuma məruz qalıb.
Məlumata görə, əməliyyatı Ukrayna Təhlükəsizlik Xidməti və Ukrayna Hərbi Dəniz Qüvvələri birgə həyata keçirib. Ukrayna mediası hücuma məruz qalan gəmilərin Rusiyanın istifadə etdiyi “kölgə donanmasının” bir hissəsi olduğunu iddia edir.
Bundan əvvəl hücuma məruz qalan “Virat” tankerinin Türkiyə sahillərinə çəkildiyi məlum olub .
Noyabrın 28-də Türkiyənin Nəqliyyat Nazirliyi tankerlərdə yanğınlar barədə məlumat yayıb. Nazirliyin məlumatına görə, sözügedən gəmilər Qambiya bayraqlı “Kairos” və “Virat” gəmiləri olub .
"Virat" Türkiyə sahillərindən təxminən 35 dəniz mili aralıda vurulub. Misirdən yola düşən "Kairos" tankeridəniz minasına toxunaraq partlayıb. Hər iki gəminin ekipaj üzvləri təhlükəsiz şəkildə təxliyə edilib.
