Amerikanın “Nvidia” şirkəti çiplər üçün proqram təminatı hazırlayan “Synopsys”in səhmlərinə 2 milyard dollar investisiya edib. “Synopsys”in bəyanatında bildirilib ki, şirkətlər strateji tərəfdaşlıq elan ediblər.
Şirkətin məlumatına görə, bu tərəfdaşlıq elmi-tədqiqat qruplarına yeni məhsulları daha dəqiq, daha sürətli və daha az xərc ilə layihələndirməyə, modelləşdirməyə və sınaqdan keçirməyə imkan verəcək.
“Bu möhtəşəm bir anlaşmadır”, — deyə “Nvidia”nın baş direktoru Censen Huanq CNBC efirində bildirib. Onun sözlərinə görə, şirkətlərin elan etdiyi tərəfdaşlıq layihələndirmə və mühəndislik sahəsində inqilab yaratmağa yönəlib. “Synopsys”in baş direktoru Sassin Qazi qeyd edib ki, əvvəllər həftələrlə vaxt alan işlər “Nvidia” ilə əməkdaşlıq sayəsində bir neçə saat ərzində yerinə yetirilə biləcək.
CNBC-nin qeyd etdiyi kimi, “Nvidia” süni intellekt bumunun ən böyük benefisiarlarından birinə çevrilib, çünki şirkət Sİ modellərinin yaradılması və öyrədilməsində əsas rol oynayan qrafik prosessorlar (GPU) istehsal edir. “Biz mərkəzi prosessorlarda aparılan ümumi məqsədli hesablamalardan qrafik prosessorlarda sürətləndirilmiş hesablamalara keçirik”, — deyə Huanq bildirib və əlavə edib ki, “dünya yeni hesablamalar üsuluna keçir”.
“Synopsys”in səhmləri anlaşma xəbəri fonunda 4%, “Nvidia”nın səhmləri isə 1% artıb. CNBC qeyd edir ki, “Nvidia” və “Synopsys” uzun müddətdir əməkdaşlıq edirlər, buna görə də hazırkı açıqlama şirkətlərin mövcud tərəfdaşlığının inkişafı kimi qiymətləndirilir.
“Nvidia” 2026-cı maliyyə ilinin üçüncü rübü üzrə maliyyə hesabatını noyabr ayında təqdim edib. Hesabat analitiklərin gözləntilərini üstələyib və şirkət dördüncü rüb üçün də güclü proqnoz verib. Şirkətin gəliri illik müqayisədə 62% artaraq rekord 57 milyard dollara çatıb. Xalis mənfəət 65% artaraq 31,91 milyard dollar təşkil edib. Düzəliş edilmiş hər səhmə düşən mənfəət 1,3 dollar olub. LSEG tərəfindən sorğulanan analitiklər gəlirin 54,92 milyard dollar, səhmə düşən mənfəətin isə 1,25 dollar səviyyəsində olacağını gözləyirdilər, CNBC qeyd edir.
Oktyabr ayının sonunda “Nvidia” tarixdə kapitallaşması 5 trilyon dollara çatan ilk publik şirkət olub.
