Son illərdə Fransada dövlət büdcəsində təhsil və tədqiqat sektoruna ayrılan vəsaitlərin davamlı şəkildə azalması ölkənin ali təhsil müəssisələrini ciddi maliyyə təzyiqi altında qoyub.
AzEdu.az xarici KİV-ə istinadən xəbər verir ki, bu azalma yalnız ümumi fəaliyyət xərclərini deyil, həm də universitetlərin tədqiqat proqramlarını, laboratoriya fəaliyyətini, akademik heyətin iş şəraitini və təhsil infrastrukturlarının yenilənməsini məhdudlaşdırıb.
Xüsusilə 2025-ci ilin dövlət büdcəsi layihəsində nəzərdə tutulan yeni yükə əsasən, universitetlər dövlətin tətbiq etdiyi əlavə sosial təminat ödənişlərini sağlamlıq sığortası haqları, pensiya ayırmaları və digər sosial öhdəlikləri öz büdcələrindən qarşılamağa məcbur edilirlər. Lakin hökumət həmin əlavə xərcləri kompensasiya etmək üçün universitetlərə heç bir əlavə maliyyə ayırmadığından, ali təhsil müəssisələri ciddi maliyyə çatışmazlığı ilə üz-üzə qalıblar.
Bu vəziyyət həm tədrisin keyfiyyətinin aşağı düşməsi, həm də bəzi akademik proqramların bağlanması riskini artırmaqla yanaşı, universitetlərin uzunmüddətli fəaliyyət sabitliyini və beynəlxalq rəqabət qabiliyyətini də təhlükə altına qoyur.
Nəticədə, Fransanın ali təhsil sistemi struktur maliyyə böhranına doğru irəliləyir və əgər vəziyyət yaxın illərdə düzəldilməzsə, təhsil prosesindən tutmuş tədqiqat sektoruna qədər genişmiqyaslı problemlər yarana bilər.
