Ukrayna Təhlükəsizlik Xidməti (SBU) Perm bölgəsində partlayıcı maddələr üçün komponentlər istehsal edən Rusiyanın “Metafrax Chemicals” kimya zavoduna dron hücumu həyata keçirib.
Bu barədə SBU-dakı mənbələr məlumat veriblər. Onların məlumatına görə, SBU-nun “Alfa” Xüsusi Əməliyyatlar Mərkəzinin dronları təcavüzkar ölkənin Rusiya daxilində, Ukrayna ilə sərhəddən 1600 kilometrdən çox məsafədə yeni dərin hücum həyata keçirib. Təsirə məruz qalan zavod Rusiya və Avropanın ən böyük metanol istehsalçılarından biridir.
Mənbə qeyd edib ki, zavod metanol, urotropin, karbamid və pentaeritritol – partlayıcı maddələr və digər hərbi materiallar üçün kimyəvi komponentlər istehsal edir. Zavod Rusiya hərbi-sənaye kompleksinin bir hissəsidir və beynəlxalq sanksiyalara məruz qalıb.
Yerli Telegram kanalları zavodun ərazisində ən azı altı partlayış və zavod işçilərinin təxliyəsi barədə məlumat verib. İlkin məlumatlara görə, atışlar metanol istehsalı müəssisəsinə dəyib. Mənbə bildirib ki, “SBU Rusiya hərbi-sənaye kompleksini silah istehsalı üçün xammal və komponentlərlə təmin edən müəssisələri sistematik şəkildə hədəfə almağa davam edir. Bu cür obyektlərin dağıdılması sursat istehsalının sürətini azaldır, orduya resursların tədarükünü çətinləşdirir və Ukraynaya qarşı hərbi əməliyyatların intensivliyinin azalmasına birbaşa təsir göstərir”.
//Samir Qurbanov, Editor.az
