Evdə şirniyyat hazırlamaq istəyənlər üçün həm az büdcəli, həm də praktik reseptimiz var.
Pravda.az cəmi 3 inqrediyentlə hazırlanan, yüngül və dadlı biskvitli tort reseptini təqdim edir:
Lazım olan inqrediyentlər
1 paket petibör biskviti (sadə və ya şokoladlı)
1 paket hazır şokoladlı pudinq
3.5 su stəkanı süd (pudinqi bişirmək üçün)
Pudinqi bişirin: İlk növbədə südü və hazır pudinq tozunu dərin bir qazana tökün. Orta odda davamlı qarışdıraraq qaynayana və qatılaşana qədər bişirin. Pudinq bişdikdən sonra ocaqdan götürün və ara-sıra qarışdıraraq bir az ilıqlanmasnı gözləyin (tam soyumamalıdır).
Formanı hazırlayın: Tortu yığacağınız qabın dibinə bir az pudinq çəkin.
Qatları yığın: Biskvitləri qaba yan-yana düzün. Üzərinə ilıq pudinqdən bir neçə qaşıq töküb bərabər şəkildə yayın.
Təkrarlayın: Biskvitlər və pudinq bitənə qədər bu prosesi qat-qat davam etdirin (adətən 3-4 qat alınır). Ən üst qata qalan bütün pudinqi töküb hamarlayın.
Soyudun: Tortun otaq temperaturuna gəlməsini gözləyin. Daha sonra soyuducuya qoyaraq ən az 2-3 saat (yaxşı olar ki, 1 gecə) gözlədin.
Bəzək üçün: Tortun üzərini bəzəmək üçün biskvit qırıntıları, üyüdülmüş püstə, fındıq və ya hind qozu (kokos) istifadə edə bilərsiniz. Əgər daha kremli bir dad istəyirsinizsə, pudinq bişib ilıqlandıqdan sonra içinə 1 xörək qaşığı kərə yağı və ya labne pendiri əlavə edib mikserlə çala bilərsiniz.
Əminə Bayramova
