ABŞ-də yerləşən yarımkeçirici şirkəti "Nvidia" süni intellekt imkanlarını noutbuk və masaüstü kompüterlərə daşıyan "RTX Spark" adlı yeni super çipini nümayiş etdirib.
AFN.az xəbər verir ki, şirkət "Microsoft Windows" əməliyyat sistemi ilə uyğun işləyəcək bu çip sayəsində süni intellekt köməkçilərinin gələcəkdə siçan və klaviaturanı əvəz edə biləcəyini açıqlayıb.
Tayvandakı "Computex" konfransında çıxış edən "Nvidia"nın baş icraçı direktoru (CEO) Censen Huanq "Nvidia" və "Microsoft" arasındakı üç illik əməkdaşlığın məhsulu olan bu çipin süni intellekt dövründə fərdi kompüterləri yenidən formalaşdıracağını bildirib.
Tayvanın "MediaTek" firmasının dəstəyi ilə hazırlanan, mikroprosessoru və qrafik çipi bir araya gətirən yeni avadanlıq süni intellekt köməkçilərinin bulud sistemlərinə ehtiyac duymadan birbaşa kompüter üzərində lokal olaraq işləməsini təmin edir.
Güclü strukturuna baxmayaraq kompüterlərin incə və yüngül qalmasına imkan verən çip "Dell", "Lenovo", "Asus" və "HP" kimi istehsalçılar tərəfindən istifadə olunacaq.
"Nvidia" istehlakçı kompüterləri bazarına yönəlmiş bu addımı ilə "Intel", "Apple", "Qualcomm" və "AMD" kimi rəqiblərinə qarşı yeni cəbhə açıb.
Analitiklər "Nvidia"nın bu gedişini "iPhone"un doğuluşuna və ya "ChatGPT" və "DeepSeek" kimi süni intellekt inqilablarına bənzədərək, ənənəvi tətbiqyönümlü kompüterlərin yerini hiper-ağıllı rəqəmsal iş yoldaşlarına verəcəyini ifadə ediblər.
Şirkət həmçinin süni intellekt köməkçiləri üçün nəzərdə tutulan "Vera" adlı mərkəzi prosessorunu (CPU) da təqdim edib və bu prosessorun ilk istifadəçiləri arasında "OpenAI", "Anthropic" və "SpaceX" kimi şirkətlər yer alır.
Süni intellektin məşğulluğa qarşı təhlükə yaratması ilə bağlı narahatlıqlara da toxunan Huanq bu texnologiyanın proqram təminatı mühəndislərinə olan tələbatı azaldacağı iddialarını tamamilə əsassız adlandırıb.
Süni intellektin işçiləri daha məhsuldar edərək məşğulluğu artıracağını müdafiə edən Huanq proqram təminatı mühəndislərinin işə qəbulunun azalmaq əvəzinə artdığını vurğulayıb.
