- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
Onların məzuniyyəti 6 gün artırılır
Əmək və Əhalinin Sosial Müdafiəsi Nazirliyindən Demokrat.az-a verilən məlumata görə, qanunvericilik işçilərin əmək stajı, iş şəraiti və ailə vəziyyətini nəzərə alaraq əlavə məzuniyyət günləri müəyyən edir.
Əmək müqaviləsi ilə faktiki işlənilən müddətdən asılı olaraq staja görə əlavə məzuniyyət günləri belə tənzimlənir:
Staj 5 ildən 10 ilə qədər olduqda – 2 təqvim günü;
Staj 10 ildən 15 ilə qədər olduqda – 4 təqvim günü;
Staj 15 ildən çox olduqda – 6 təqvim günü.
Zərərli, ağır və yeraltı işlərdə çalışanlar, həmçinin yüksək zehni, fiziki gərginlik və həyəcan tələb edən vəzifələrdə işləyənlər üçün azı 6 təqvim günü əlavə məzuniyyət nəzərdə tutulur.
Uşaqlı valideynlər üçün də güzəştlər mövcuddur. 14 yaşınadək iki uşağı olan qadınlara 2 gün, üç və daha çox uşağı olan, yaxud əlilliyi müəyyən edilmiş uşaq böyüdən analara isə 5 təqvim günü əlavə məzuniyyət verilir. Bu qayda uşaqlarını təkbaşına böyüdən atalara və övladlığa götürən şəxslərə də şamil olunur.
Yəni, Azərbaycanda rəsmi iş stajınız 5 ili keçibsə, uşaqlarınız varsa və ya ağır işdə çalışırsınızsa, qanunla əsas məzuniyyətinizə əlavə olaraq bir neçə gün də ödənişli istirahət hüququ qazanırsınız.
Demokrat.az
